கோவையில் இன்ஸ்டாகிராமில் அறிமுகமான தோழியை சந்திக்க வீட்டை விட்டு வெளியேறிய சிறுமியை போலீஸாா் மீட்டனா்
கோவை, வெள்ளலூா் பகுதியைச் சோ்ந்த 13 வயது சிறுமி அருகில் உள்ள தனியாா் பள்ளியில் 8ஆம் வகுப்பு படித்து வருகிறாா். இவா் நீண்ட நேரம் கைப்பேசியில் நேரத்தை செலவிட்டு வந்ததால், அவரது பெற்றோா் கண்டித்துள்ளனா். இதனால் கோபமடைந்த சிறுமி கடந்த 2 நாள்களுக்கு முன்பு வீட்டை விட்டு வெளியேறியுள்ளாா்.
இது தொடா்பாக, சிறுமியின் பெற்றோா் அளித்து புகாரின்பேரில் ராமநாதபுரம் அனைத்து மகளிா் காவல் நிலைய போலீஸாா், சிறுமியின் தோழிகளிடம் விசாரணை மேற்கொண்டனா். அதில், மாயமான சிறுமி சென்னையைச் சோ்ந்த அவரது தோழி ஒருவருடன் இன்ஸ்டாகிராமில் அடிக்கடி பேசி வந்தது தெரியவந்தது.
இதையடுத்து, கோவையில் உள்ள அவரது தோழி மூலம் சிறுமியை விடியோ காலில் தொடா்பு கொண்டு போலீஸாா் பேச வைத்தனா். அப்போது சிறுமிதான் சென்னையில் உள்ள தோழியை பாா்க்க சென்று கொண்டிருப்பதாக தெரிவித்தாா்.
இதனைத் தொடா்ந்து, போலீஸாா், ஜிபிஎஸ் சிக்னலை வைத்து அரக்கோணம் ரயில் நிலையத்தை ரயில் நெருங்குவதை அறிந்தனா். உடனே போலீஸாா், சிறுமியின் புகைப்படத்தை அரக்கோணம் ரயில்வே போலீஸாருக்கு அனுப்பிவைத்து தகவல் தெரிவித்தனா். இதையடுத்து, அரக்கோணம் நிலையத்துக்கு ரயில் சென்றவுடன், சிறுமியை ரயில்வே போலீஸாா் மீட்டனா். பின்னா், கோவை போலீஸாா் மூலமாக சிறுமி பெற்றோரிடம் ஒப்படைக்கப்பட்டாா்.