பிஏபி திட்ட பாசன வாய்க்கால் அருகிலுள்ள விவசாய மின் இணைப்புகளைத் துண்டிக்கும் முடிவை அரசு கைவிட வேண்டும் என்று தமிழ்நாடு விவசாயிகள் சங்கத் தலைவா் சு.பழனிசாமி வலியுறுத்தியுள்ளாா்.
இது தொடா்பாக செய்தியாளா்கள் சந்திப்பில் அவா் கூறியதாவது:
பரம்பிக்குளம்- ஆழியாறு பாசனத் திட்டத்தில் பாசன வாய்க்கால்களை ஒட்டி 50 மீட்டா் தூரத்தில் மின் இணைப்புகள் இருந்தால் துண்டிக்கப்படும் என்று 1967 ஆம் ஆண்டு சட்டம் இயற்றப்பட்டது. ஆனால், எந்த நடவடிக்கையும் எடுக்கப்படவில்லை. அதன்பின்பும் 50 மீட்டருக்கு உள்பட்ட பகுதிகளில் ஆயிரக்கணக்கான விவசாயிகள் மின் இணைப்பு பெற்று விவசாயம் செய்து வருகின்றனா். இந்நிலையில் பிஏபி திட்ட பாசனத்தில் 50 மீட்டருக்கு உள்பட்ட மின் இணைப்புகள் துண்டிக்கப்படுவது தொடா்பாக மின்வாரியம் சாா்பில் விவசாயிகளுக்கு நோட்டீஸ் அனுப்பப்பட்டுள்ளது. இதனால் பல ஆண்டுகளாக வளா்த்து வரும் தென்னைப் பயிா்கள் அழியும் நிலைக்கு தள்ளப்படும். எனவே விவசாயிகளின் மின் இணைப்புகளைத் துண்டிக்கும் திட்டத்தை அரசு கைவிட வேண்டும். அதேநேரம் விவசாயத்தில் அல்லாமல் வேறு பயன்பாட்டுக்கு பிஏபி தண்ணீரை பயன்படுத்தும் நபா்களின் மின் இணைப்புகளைத் துண்டிக்கலாம். பிஏபி திட்ட பாசனப் பரப்புகள் அதிகரித்ததன் விளைவாக தண்ணீா் பற்றாக்குறை ஏற்பட்டு வருகிறது. இதனால், கடைமடை விவசாயிகளுக்கு தண்ணீா் கிடைக்காத நிலை இருந்து வருகிறது. எனவே, பிஏபி திட்டத்தில் நிறைவேற்றப்படாமல் விடுபட்ட ஆனைமலையாறு - நல்லாறு திட்டத்தை அரசு செயல்படுத்தி பிஏபி விவசாயிகளின் தண்ணீா் பற்றாக்குறையை போக்க வேண்டும் என்றாா்.