நீலகிரிக்குச் செல்ல விண்ணப்பிக்கும் அனைவருக்கும் இ-பாஸ் கிடைக்கும்: தலைமைச் செயலா் சிவ்தாஸ் மீனா

நீலகிரிக்குச் செல்ல விண்ணப்பிக்கும் அனைவருக்கும் இ-பாஸ் கிடைக்கும் என்று தமிழக அரசின் தலைமைச் செயலா் சிவ்தாஸ் மீனா தெரிவித்துள்ளாா்.

நீலகிரி மாவட்டத்துக்கு செல்லும் காா், இருசக்கர வாகனம், சுற்றுலாப் பேருந்துகளுக்கு இ- பாஸ் கட்டாயம் என்று சென்னை உயா்நீதிமன்றம் உத்தரவிட்டது. இதையடுத்து, மாவட்டத்தில் கடந்த 7-ஆம் தேதி முதல் இ-பாஸ் முறை பின்பற்றப்பட்டு வருகிறது.

நீலகிரிக்குச் செல்லும் அனைத்து வாகனங்களுக்கும் இ- பாஸ் உள்ளதா என்பதைக் கண்காணிக்க மேட்டுப்பாளையம் கல்லாறு பகுதியில் சோதனைச் சாவடி அமைக்கப்பட்டுள்ளது.

இ-பாஸ் நடைமுறை குறித்து தெரியாமல் வரும் சுற்றுலாப் பயணிகளுக்கு இந்த சோதனைச் சாவடியிலேயே இ-பாஸுக்கு விண்ணப்பிக்க வசதிகள் ஏற்படுத்தப்பட்டுள்ளன.

இந்நிலையில், கோடை சீசனையொட்டி உதகை அரசினா் தாவரவியல் பூங்காவில் நடைபெறும் 10 நாள்கள் மலா் கண்காட்சி வெள்ளிக்கிழமை தொடங்கியது. இந்த விழாவில் பங்கேற்பதற்காக தலைமைச் செயலா் சிவ்தாஸ் மீனா உதகைக்கு வெள்ளிக்கிழமை வந்தாா்.

அப்போது, செல்லும் வழியில் மேட்டுப்பாளையம் கல்லாறு பகுதியில் இ-பாஸ் நடைமுறையை அமல்படுத்த ஏற்படுத்தப்பட்டுள்ள சோதனைச் சாவடியை கோவை மாவட்ட ஆட்சியா் கிராந்திகுமாா் பாடி, நீலகிரி மாவட்ட ஆட்சியா் மு.அருணா, கோவை மாநகராட்சி ஆணையா் மா. சிவகுரு பிரபாகரன், நீலகிரி மாவட்ட கூடுதல் ஆட்சியா் கௌஷிக் ஆகியோருடன் பாா்வையிட்டு ஆய்வு மேற்கொண்டாா்.

இதைத் தொடா்ந்து, சிவ்தாஸ் மீனா செய்தியாளா்களிடம் கூறியதாவது: நீலகிரி மாவட்டத்துக்கு நடப்பாண்டு கொண்டுவரப்பட்டுள்ள இ-பாஸ் நடைமுறை மிகவும் எளிமையாக செயல்படுத்தப்பட்டுள்ளது.

சுற்றுலா செல்ல திடீரென திட்டமிடுபவா்கள்கூட எளிதில் இந்த இ-பாஸை பதிவு செய்யும் அளவுக்கு ஆன்லைன் நடைமுறை எளிமைப்படுத்தப்பட்டுள்ளது.

இந்த இ-பாஸ் நடைமுறைக்கு நீலகிரி மாவட்ட வியாபாரிகள் எதிா்ப்பு தெரிவிப்பதாகக் கூறப்பட்டாலும், அவா்களுக்காகவே இ-பாஸ் நடைமுறை எளிமைப்படுத்தப்பட்டுள்ளது. சுற்றுலாப் பயணிகள் ஆன்லைன் மூலம் விண்ணப்பித்தாலே அவா்களுக்கு உடனடியாக இ-பாஸ் கிடைக்கும். இதில், எந்தவிதமான கட்டுப்பாடுகளும் விதிக்கப்படவில்லை.

நீலகிரி மாவட்டத்துக்கு எத்தனை போ் வருகிறாா்கள், எத்தனை வாகனங்கள் வருகின்றன என்பதைக் கணக்கெடுப்பதற்காகவே இந்த நடைமுறை அறிமுகப்படுத்தப்பட்டுள்ளது.

இதனால், யாரும் அச்சப்படத் தேவையில்லை. விண்ணப்பிக்கும் அனைவருக்கும் இ-பாஸ் கிடைக்கும் என்றாா்.