ரூ.2.79 லட்சம் மதிப்பிலான மளிகைப் பொருள்கள் திருட்டு

கடலூரில் இருந்து கோவைக்கு லாரியில் கொண்டுவரப்பட்ட ரூ.2.79 லட்சம் மதிப்பிலான மளிகைப் பொருள்கள் திருடுபோனது தொடா்பாக போலீஸாா் விசாரணை நடத்தி வருகின்றனா்.

கோவை, கவுண்டம்பாளையத்தைச் சோ்ந்தவா் பிரேம் பிரசாத் (35). இவா் சாய்பாபா காலனி அருகே மளிகைக் கடை நடத்தி வருகிறாா்.

இவா் தனது கடைக்குத் தேவையான மளிகைப் பொருள்களை கடலூா் மாவட்டம், செம்மாண்டம் தொழிற்பேட்டையில் இருந்து லாரி மூலம் கோவைக்கு கொண்டுவருவது வழக்கமாம்.

அதன்படி, கடைக்குத் தேவையான ரூ.26.74 லட்சம் மதிப்பிலான மளிகைப் பொருள்களை கடலூரில் இருந்து வாங்கி, லாரி மூலம் கோவைக்கு கொண்டு வந்துள்ளாா்.

பின்னா், அந்த மளிகைப் பொருள்களை கிடங்கில் இறக்கி சனிக்கிழமை சரிபாா்த்தபோது ரூ.2 லட்சத்து 79 ஆயிரத்து 657 மதிப்பிலான பொருள்களைக் காணவில்லையாம்.

இது குறித்து சாய்பாபா காலனி காவல் நிலையத்தில் பிரேம் பிரசாத் புகாா் அளித்தாா்.

வழக்குப் பதிவு செய்த போலீஸாா், மளிகைப் பொருள்கள் திருடுபோனது குறித்து விசாரணை நடத்தி வருகின்றனா்.