Enable Javscript for better performance
ஈரோட்டில் தாய்லாந்து நாட்டினா் தங்கிய பகுதிகள், வீடுகளில் அடையாள வில்லை, கைகளில் ‘சீல்’- Dinamani

சுடச்சுட

    

    ஈரோட்டில் தாய்லாந்து நாட்டினா் தங்கிய பகுதிகள், வீடுகளில் அடையாள வில்லை, கைகளில் ‘சீல்’

    By DIN  |   Published on : 24th March 2020 01:02 AM  |   அ+அ அ-   |    |  

    erd23mark_2303chn_124_3

    வீடுகளில் வில்லைகள் ஒட்டி, கைகளில் அடையாளம் இடும் பணியை பாா்வையிடுகிறாா் மாவட்ட ஆட்சியா் சி.கதிரவன்.

    தாய்லாந்து நாட்டினா் தங்கிச் சென்ற பகுதிகள் பாதுகாக்கப்பட்ட பகுதிகளாக அறிவிக்கப்பட்டுள்ள நிலையில் அப்பகுதிகளில் உள்ள வீடுகளில் அடையாள வில்லை (ஸ்டிக்கா்) ஒட்டப்பட்டு, அங்குள்ளவா்கள் கைகளில் ‘சீல்’ வைக்கப்பட்டுள்ளது.

    ஈரோடு, கொல்லம்பாளையம், சுல்தான்பேட்டை பகுதிக்கு கடந்த 16 ஆம் தேதி வந்த தாய்லாந்து நாட்டைச் சோ்ந்த 5 பேரில் இருவருக்கு கரோனா தொற்று இருப்பது உறுதியானது. இதனால் அவா்கள் தங்கிய கொல்லம்பாளையம், சுல்தான்பேட்டையில் 9 வீதிகளுக்கு சீல் வைத்து, பாதுகாக்கப்பட்ட பகுதியாக அறிவிக்கப்பட்டுள்ளது.

    இந்நிலையில் அப்பகுதிக்கு திங்கள்கிழமை வந்த மாவட்ட ஆட்சியா் சி.கதிரவன், மாநகராட்சி ஆணையா் எம்.இளங்கோவன் ஆகியோா் அந்த வீடுகளை அடையாளம் காணும் வகையில் வில்லைகளை ஒட்டினா். அந்த வில்லையில் அவ்வீட்டின் குடும்பத் தலைவா் பெயா், மொத்த உறுப்பினா் எண்ணிக்கையைக் குறித்தனா். மேலும் அந்த வீட்டில் உள்ள ஒவ்வொருவரது வலது கையிலும் அழியாத சீல் வைத்தனா்.

    இதுகுறித்து ஆட்சியா் கூறியதாவது:

    இப்பகுதியில் உள்ள 160 வீடுகளைச் சோ்ந்த 695 நபா்கள், வீடுகளில் தனிமைப்படுத்தப்பட்டுள்ளனா். அவா்களது வீடுகளில் வில்லைகள் ஒட்டப்பட்டு அங்குள்ளவா்கள் இடது கையில் சீல் வைக்கப்பட்டுள்ளது. இதன் மூலம் மற்றவா்கள் அவா்களை எளிதாக அடையாளம் காண முடியும். இவா்களுக்குத் தொற்று இல்லை என உறுதிப்படுத்த 28 நாள்கள் ஆகும். அதுவரை தனிமைப்படுத்தப்படுவா்.

    இவா்களுக்குத் தேவையான காய்கறி, பழங்கள் போன்றவை மாநகராட்சி மூலம் சந்தை விலையில் கிடைக்க வழி செய்யப்படும். ஏ.டி.எம். செல்லுதல் போன்றவற்றுக்கு அங்கு நிறுத்தப்படும் போலீஸாா் மற்றும் பிற பணியாளா்கள் உதவி செய்வாா்கள். நடமாடும் ஏ.டி.எம் வரவழைக்கப்படும். காசோலை, பிற பண பரிவா்த்தனை செய்ய கோரினால் உதவி செய்து கொடுக்கப்படும்.

    மாநில அளவில் செவ்வாய்க்கிழமை (மாா்ச்24) மாலை முதல் 144 தடை உத்தரவு அமலாகிறது. அத்தியாவசிய இயக்கமான ஆம்புலன்ஸ், காய்கறி, ரேஷன், பால் போன்றவை விநியோகிக்கப்படும். மாவட்ட, மாநில எல்லைகள் மூடப்படும்.

    ஆம்புலன்ஸ், அரசு வாகனங்கள் இயக்கப்படும். முக்கிய அரசு அலுவலகங்கள் தவிர மற்றவை செயல்படாது. தொழிற்சாலைகள் மாலைக்குள் மூடப்படும். தொழிலாளா்களுக்கு ஊதியத்துடன் விடுப்பு வழங்கப்படும். நியாயவிலைக் கடைகளில் தட்டுப்பாடு இன்றி பொருள்கள் கிடைக்கும், அச்சப்பட வேண்டாம். ஏ.டி.எம் மையங்களுக்கு வருவோருக்கு கைகளை சுத்தம் செய்ய கிருமி நாசினி அளிக்கப்படும் என்றாா்.

     

     

     

    kattana sevai