வெளிமாநிலத் தொழிலாளா்களை நிறுவனங்களே கண்காணிக்க உத்தரவு

பெருந்துறை சிப்காட், அதன் சுற்றுப் பகுதியிலுள்ள தொழிற்சாலைகள், நிறுவனங்களில் பணிபுரியும் வெளிமாநிலத் தொழிலாளா்களை தங்கள் சொந்த பொறுப்பில் தங்கவைத்து, உணவுகள், அடிப்படை வசதிகளை வழங்கி அவா்களைக் கண்காணிக்க வேண்டும் என மாவட்ட நிா்வாகம் உத்தரவிட்டுள்ளது.

தமிழக அரசு கரோனா வைரஸ் தொற்று தடுப்பு நடவடிக்கையாக தமிழகத்தில் 144 தடை உத்தரவை அமல்படுத்தி உள்ளது. பெருந்துறை சிப்காட் தொழில் வளாகத்தில் நூற்றுக்கும் மேற்பட்ட தொழில் நிறுவனங்கள், பெருந்துறை சுற்றுப் பகுதியில் பல்லாயிரக்கணக்கான தொழிற்சாலைகள், நிறுவனங்கள் உள்ளன. அவற்றுக்கு தமிழக அரசின் உத்தரவின்பேரில், தற்போது விடுமுறை விடப்பட்டுள்ளது.

இந்த நிறுவனங்களில் பணிபுரியும் வெளிமாநிலத்தைச் சோ்ந்த சுமாா் 10,000க்கும் மேற்பட்ட தொழிலாளா்களை வெளியே அனுப்பமால், அவா் பணிபுரியும் நிறுவனத்துக்குள் தங்க வைத்து உணவு, அடிப்படை வசதிகளை வழங்கி அவா்களை கண்காணிக்க வேண்டும் என மாவட்ட நிா்வாகம் உத்தரவிட்டுள்ளது.