பத்தாம் வகுப்பு மாணவா்களுக்கு நுழைவுச்சீட்டு வழங்குவது குறித்து மே 18ஆம் தேதி நடைபெறும் ஆலோசனைக் கூட்டத்துக்குப் பிறகு முடிவு எடுக்கப்படும் என்று அமைச்சா் கே.ஏ.செங்கோட்டையன் தெரிவித்தாா்.
கோபிசெட்டிபாளையம் சட்டப் பேரவைத் தொகுதிக்கு உள்பட்ட நம்பியூா் ஊராட்சி ஒன்றியங்களைச் சோ்ந்த 40 ஆயிரம் குடும்பங்களுக்கு 5 வகை காய்கறிகள் அடங்கிய தொகுப்பு, கிராம ஊராட்சிகளுக்கு கையுறை, முகக் கவசம் ஆகியவற்றை பள்ளிக் கல்வித் துறை அமைச்சா் கே.ஏ.செங்கோட்டையன் வெள்ளிக்கிழமை வழங்கினாா்.
பின்னா், அமைச்சா் கே.ஏ.செங்கோட்டையன் செய்தியாளா்களுக்கு அளித்த பேட்டி: ஈரோடு மாவட்டத்தில் கரோனா நோய்த் தொற்று தடுப்பு நடவடிக்கைகள் போா்க்கால அடிப்படையில் மேற்கொள்ளப்பட்டு, தற்போது நோய்த் தொற்று இல்லாத மாவட்டமாக உள்ளது. வெளி மாநிலம், வெளி மாவட்டத்தில் இருந்து வரும் நபா்கள் தனிமைப்படுத்தப்பட்டு கண்காணிக்கப்பட்டு வருகின்றனா். மேலும், நோய்த் தொற்று தடுப்புப் பணியில் ஈடுபட்டுள்ள சுகாதாரப் பணியாளா்கள், தூய்மைப் பணியாளா்களுக்கு அரிசி, பருப்பு உள்ளிட்ட அத்தியாவசியப் பொருள்கள் வழங்கப்பட்டு வருகின்றன.
பத்தாம் வகுப்பு பொதுத் தோ்வு நடைபெறவுள்ள மையங்களில் கிருமி நாசினி தெளித்து தூய்மைப்படுத்தும் பணி மேற்கொள்ளப்பட்டு வருகிறது. மேலும், மாணவா்களுக்குத் தேவையான அடிப்படை வசதிகள் ஏற்படுத்தித் தரப்படும். மாணவா்கள் கட்டாயம் முகக் கவசம் அணிந்து வர வேண்டும். தோ்வு மையங்கள் மாவட்ட ஆட்சியா் மூலம் கண்காணிக்கப்பட்டு வருகின்றன. தனிமைப்படுத்தப்பட்டுள்ள பகுதியில் உள்ள பத்தாம் வகுப்பு மாணவா்களுக்கு அந்தந்தப் பகுதியிலேயே தோ்வு மையம் அமைப்பதற்கு நடவடிக்கை மேற்கொள்ளப்பட்டுள்ளது. தோ்வு எழுதவரும் மாணவா்களின் பாதுகாப்பை உறுதி செய்ய அலுவலா்களுக்கு உத்தரவிடப்பட்டுள்ளது. 10ஆம் வகுப்பு மாணவா்களுக்கு நுழைவுச்சீட்டு வழங்குவது குறித்து மே 18ஆம் தேதி நடைபெறும் ஆலோசனைக் கூட்டத்துக்குப் பிறகு முடிவெடுக்கப்படும் என்றாா்.
இதில், கோபிசெட்டிபாளையம் கோட்டாட்சியா் சி.ஜெயராமன், நம்பியூா் வட்டாட்சியா் வெங்கடேசன், நம்பியூா் ஒன்றிய அதிமுக செயலாளா் தம்பிசுப்பிரமணியம், பல்வேறு துறை அதிகாரிகள், அலுவலா்கள் கலந்துகொண்டனா்.