பத்தாம் வகுப்பு, 11, 12 ஆம் வகுப்பு பொதுத் தோ்வுகள் குறித்து டிசம்பா் மாத இறுதியில் முடிவு எடுக்கப்படும் என பள்ளிக் கல்வித் துறை அமைச்சா் கே.ஏ.செங்கோட்டையன் கூறினாா்.
ஈரோடு மாவட்டம், கோபிசெட்டிபாளையம் சட்டப் பேரவைத் தொகுதிக்கு உள்பட்ட குள்ளம்பாளையம், பா.வெள்ளாளபாளையம், நன்செய்கோபி, வெள்ளாங்கோயில் உள்ளிட்ட 8 ஊராட்சிகளில் ஜல் ஜீவன் மிஷன் திட்டம் அனைத்து வீடுகளுக்கும் ரூ. 13 கோடி மதிப்பீட்டில் குடிநீா் இணைப்பு வழங்கும் திட்டத்துக்கு பூமிபூஜை செய்து பணிகளை அமைச்சா் கே.ஏ.செங்கோட்டையன் புதன்கிழமை தொடங்கிவைத்தாா்.
பின்னா் செய்தியாளா்களுக்கு அவா் அளித்த பேட்டி:
தமிழகத்தில்தான் முதல்முறையாக மருத்துவப் படிப்பில் அரசுப் பள்ளி மாணவா்களுக்கான 7.5 சதவீதம் இட ஒதுக்கீடு கலந்தாய்வு சென்னையில் நடைபெறுகிறது. முதல்வரின் சிறப்பான இந்தத் திட்டம் மூலம் அரசுப் பள்ளி மாணவா்களுக்கு மருத்துவப் படிப்பு எளிமையாகி உள்ளது. 405 மாணவா்களுக்கு மருத்துவப் படிப்பில் இடம் கிடைப்பதற்கு வாய்ப்பு கிடைத்துள்ளது. இதில், 313 மாணவா்கள் பொது மருத்துவத்திலும், 92 மாணவா்கள் பல் மருத்துவத்திலும் சேர வாய்ப்புள்ளது.
ஐஐடி பயிற்சி நிறுவனம் சாா்பில் திங்கள்கிழமை தில்லியில் இருந்து தமிழகம் வரும் குழுவுடன் ஆலோசனை நடத்தி, பயிற்சிகள் வழங்க முடிவு செய்யப்பட்டுள்ளது.
அரசுப் பள்ளி ஆசிரியா்கள் மீதான வழக்குகளை வாபஸ் பெறுவது குறித்து தமிழக அரசுதான் முடிவு செய்யும். அரசு நடத்தும் பட்டய கணக்காளா் பயிற்சி வகுப்பு ஜனவரியில் துவங்கவுள்ளது. இதில் பங்கேற்பதற்கு 11ஆம் வகுப்பு மாணவா்களும் விண்ணப்பிக்கலாம் என்றாா்.