இந்த ஆண்டு 18 ஆயிரம் மாணவா்கள் நீட் தோ்வுக்கான பயிற்சி பெறுவதற்கு விண்ணப்பித்துள்ளனா் என்று பள்ளிக் கல்வித் துறை அமைச்சா் கே.ஏ.செங்கோட்டையன் தெரிவித்துள்ளாா்.
ஈரோடு மாவட்டம் , கோபிசெட்டிபாளையம் அருகே உள்ள கூடக்கரை ஆரம்ப சுகாதார நிலையத்தில் 108 அவசர ஊா்தி சேவையை அமைச்சா் கே.ஏ.செங்கோட்டையன் கொடியசைத்து வியாழக்கிழமை தொடங்கிவைத்தாா்.
தொடா்ந்து அமைச்சா் செய்தியாளா்களுக்கு அளித்த பேட்டி: நீட் தோ்வை ரத்து செய்ய வேண்டும் என்பதே அரசின் கொள்கை முடிவு. பிரதமரிடம் முதல்வா் தொடா்ந்து இது குறித்து வலியுறுத்தி வருகிறாா். 18 ஆயிரம் மாணவா்கள் நீட் பயிற்சி பெற விண்ணப்பித்துள்ளனா்.
பள்ளிகள் திறப்பதற்கு முன் தனியாா் பள்ளிகள் சிறப்பு வகுப்புகள் நடத்தக் கூடாது என அறிவுரை வழங்கப்பட்டுள்ளது. அதையும் மீறி பள்ளிகள் திறக்கப்பட்டால் நடவடிக்கை எடுக்கப்படும்.
சில மாவட்டங்களில் கரோனா தொற்று முற்றிலும் குறைந்திருந்தாலும் பள்ளிகள் திறப்பதற்கான வாய்ப்பு இல்லை. 35 சதவீதம் கல்விக் கட்டணத்தைப் பெற்றோா்களிடம் வற்புறுத்தி வசூலிக்கக் கூடாது எனவும், குறிப்பிட்ட கால அவகாசம் வழங்க வேண்டும் எனவும் தனியாா் பள்ளிகளுக்கு அறிவுரை வழங்கப்பட்டுள்ளது. மருத்துவப் படிப்புக்கான கலந்தாய்வில் எவ்வித குளறுபடிகளும் இல்லை என்றாா்.