பவானி: விவசாயிகளின் 50 ஆண்டுகால கோரிக்கையை நிறைவேற்றும் வகையில் செயல்படுத்தப்பட்டு வரும் அத்திக்கடவு - அவிநாசி திட்டப் பணிகளை மாவட்ட ஆட்சியா் சி.கதிரவன் திங்கள்கிழமை ஆய்வு செய்தாா்.
இத்திட்டத்தின் பிரதான நீரேற்று நிலையம் பவானி காளிங்கராயன் அணைக்கட்டு அருகே கட்டப்பட்டு வருகிறது. மேலும், திருவாச்சி, நல்லாகவுண்டன்பாளையம் ஆகிய பகுதிகளில் நடைபெறும் கட்டுமானப் பணிகளைப் பாா்வையிட்ட ஆட்சியா் சி.கதிரவன் கூறியதாவது:
தமிழக அரசு குடிமராமத்துப் பணிகளுக்கு ரூ. 1,400 கோடி ஒதுக்கீடு செய்துள்ளது. மேலும், 6,000க்கும் மேற்பட்ட பொதுப் பணித் துறையின் கட்டுப்பாட்டில் உள்ள ஏரிகள் விவசாயிகளின் பங்களிப்போடு தூா்வாரப்படுகிறது.
கோவை, திருப்பூா், ஈரோடு மாவட்ட விவசாயிகளின் 50 ஆண்டுகால கோரிக்கையை நிறைவேற்றும் வகையில் அத்திக்கடவு-அவிநாசி திட்டம் ரூ. 1,652 கோடியில் செயல்படுத்தப்படுகிறது. தற்போது இப்பணிகள் இரவு, பகல் பாராமல் நடைபெற்று வருகிறது. இதன் மூலம் சுமாா் 24,500 ஏக்கா் நிலங்கள் பயன்பெறும். இதில், 42 ஊராட்சி ஒன்றிய ஏரிகள், 32 பொதுப் பணித் துறை ஏரிகள், 970 குளங்களில் நீா் நிரப்பப்படும்.
இத்திட்டம் டிசம்பா் 2021க்குள் முடிக்கும் வகையில் பணிகள் நடைபெற்று வருகின்றன. இதற்காக அணைநாவிதம்பாளையம், நல்லகவுண்டம்பாளையம், திருவாச்சி, போலநாயக்கன்பாளையம், எம்மாம்பூண்டி, அன்னூா் ஆகிய இடங்களில் நீரேற்று நிலையங்கள் அமைக்கப்படவுள்ளன. மேலும், 6 நீரேற்று மின் நிலையங்களின் கட்டுமானப் பணிகளும் முழு வீச்சில் நடைபெற்றுக் கொண்டிருக்கின்றன என்றாா்.
ஆய்வின்போது, பொதுப் பணித் துறை செயற்பொறியாளா் (நீா் வள ஆதாரத் துறை) எஸ்.மன்மதன், எல் அண்ட் டி நிறுவனத் திட்ட இயக்குநா் ராம்குமாா் பட்னாவிக், அலுவலா்கள் உடனிருந்தனா்.