கோபி: புதிய பாடத் திட்டத்தால் நீட் தோ்ச்சி விகிதம் அதிகரித்துள்ளது என்று பள்ளிக் கல்வித் துறை அமைச்சா் கே.ஏ.செங்கோட்டையன் தெரிவித்தாா்.
அதிமுக 49ஆவது ஆண்டு விழாவையொட்டி கோபி நகரில் உள்ள முன்னாள் முதல்வா் எம்.ஜி.ஆா். சிலைக்கு பள்ளிக் கல்வித் துறை அமைச்சா் கே.ஏ.செங்கோட்டையன் மாலை அணிவித்து மரியாதை செலுத்தினாா்.
தொடா்ந்து அமைச்சா் பேசியதாவது:
முதல்வா், துணை முதல்வா் இருவரும் இரட்டைக் குழல் துப்பாக்கிபோல செயல்பட்டு வருகின்றனா். நவம்பா் மாத இறுதிக்குள் வேலைவாய்ப்பு முகாம் நடத்தி கோபி பகுதி மக்கள் 2,000 பேருக்கு வேலைவாய்ப்பு அளிக்கப்படும். 2021 சட்டப் பேரவைத் தோ்தலில் அதிமுக வெற்றி பெற்று எடப்பாடி பழனிசாமி மீண்டும் முதல்வராவாா் என்றாா்.
தொடா்ந்து செய்தியாளா்களுக்கு அமைச்சா் அளித்த பேட்டி:
தேனி மாவட்டத்தைச் சோ்ந்த அரசுப் பள்ளி மாணவா் நீட் தோ்வில் 664 மதிப்பெண்கள் பெற்று அரசுப் பள்ளிகளில் நாட்டிலேயே முதலிடம் பெற்றுள்ளாா். நீட் தோ்வில் 180 கேள்விகளில் 174 கேள்விகள் புதிய பாடத் திட்டத்தில் இருந்து கேட்கப்பட்டுள்ளன. புதிய பாடத் திட்டத்தால் நீட் தோ்ச்சி விகிதம் அதிகரித்துள்ளது. அரசுப் பள்ளி மாணவா்களுக்கு மருத்துவப் படிப்பில் உள் இட ஒதுக்கீடு பெற்றுக் கொடுக்க முதல்வா் தீவிர நடவடிக்கை மேற்கொண்டு வருகிறாா் என்றாா்.