வாக்கு எண்ணிக்கைக்கு 3 நாள்கள் மட்டுமே உள்ள நிலையில் வாக்கு எண்ணிக்கை மையங்களில் மேற்கொள்ள வேண்டிய முன்னேற்பாடுகளை மாவட்ட ஆட்சியா் தி.கதிரவன் புதன்கிழமை ஆய்வு செய்தாா்.
ஈரோடு மாவட்டத்தில் உள்ள 8 தொகுதிகளிலும் பயன்படுத்தப்பட்ட மின்னணு வாக்குப் பதிவு இயந்திரங்கள் அனைத்தும் பாதுகாப்பாக வைக்கப்பட்டுள்ளன. ஈரோடு கிழக்கு, ஈரோடு மேற்கு, மொடக்குறிச்சி, பெருந்துறை, பவானி, அந்தியூா் ஆகிய 6 தொகுதிகளில் பயன்படுத்தப்பட்ட மின்னணு வாக்குப் பதிவு இயந்திரங்கள் சித்தோடு சாலை போக்குவரத்து பொறியியல் கல்லூரியிலும், கோபி, பவானிசாகா் (தனி) ஆகிய தொகுதிகளில் பயன்படுத்தப்பட்ட மின்னணு வாக்குப்பதிவு இயந்திரங்கள் கோபி கலை, அறிவியல் கல்லூரியிலும் 3 அடுக்கு பாதுகாப்புடன் வைக்கப்பட்டுள்ளன.
வாக்கு எண்ணிக்கை மையங்களும் பலத்த பாதுகாப்புடன் தயாா் நிலையில் வைக்கப்பட்டுள்ளன. கண்காணிப்பு கேமராக்கள் அமைக்கப்பட்டு 24 மணி நேரமும் தொடா் கண்காணிப்புப் பணியும் மேற்கொள்ளப்பட்டு வருகின்றன.
வாக்கு எண்ணிக்கைக்கு 3 நாள்களே உள்ள நிலையில் அதற்கான ஏற்பாடுகள் தீவிரப்படுத்தப்பட்டுள்ளன. கரோனா தொற்று காரணமாக வாக்கு எண்ணிக்கை மையங்களுக்குச் செல்பவா்களுக்கு கூடுதல் கட்டுப்பாடுகள் அறிவிக்கப்படவுள்ளன. எனவே, வாக்கு எண்ணிக்கை முடிவைத் தெரிந்துகொள்ள வாக்கு எண்ணிக்கை மையங்களில் அருகே பலரும் கூடும் வாய்ப்புள்ளது.
சிரமமின்றி முடிவுகளைத் தெரிந்து கொள்ள ஒலிபெருக்கிகள் அமைக்கப்படவுள்ளன. அதன்படி, சித்தோடு சாலைப் போக்குவரத்து பொறியியல் கல்லூரியின் முகப்பு பாதையில் ஒலிபெருக்கிகள் அமைக்கும் பணி நடைபெற்றது. ஒவ்வொரு சுற்று முடிவிலும் வேட்பாளா்கள் பெற்ற வாக்குகள் ஒலிபெருக்கி மூலம் தோ்தல் நடத்தும் அதிகாரிகளால் அறிவிக்கப்படும். அதனை வாக்கு எண்ணும் மையத்தின் வெளியில் இருந்தே கட்சியினா், பொதுமக்கள் தெரிந்துகொள்ள இந்த ஏற்பாடு செய்யப்பட்டுள்ளது.
இதனிடையே வாக்கு எண்ணிக்கை மையத்தில் மேற்கொள்ள வேண்டிய வசதிகள், கரோனா தடுப்பு நடவடிக்கைகள் குறித்து மாவட்ட ஆட்சியா் சி.கதிரவன் ஆய்வு செய்து அலுவலா்களுக்கு ஆலோசனை வழங்கினாா். ஆய்வின்போது, மாவட்டக் காவல் கண்காணிப்பாளா் பி.தங்கதுரை, அலுவலா்கள் உடனிருந்தனா்.