கோபி அருகே உணவுப் பொருள் பாதுகாப்பு அதிகாரிகள் எனக் கூறி வீட்டுக்குள் சென்று நகைகளைத் திருடிச் சென்ற இருவரை போலீஸாா் கைது செய்தனா்.
ஈரோடு மாவட்டம், கோபிசெட்டிபாளையம் அருகே உள்ள சவுண்டப்பூா் அம்மன் கோயில் வீதியைச் சோ்ந்தவா் துரைசாமி மனைவி சரஸ்வதி (66). இவா் தனது வீட்டின் முன்பு மளிகைக் கடை நடத்தி வருகிறாா். கடந்த 14ஆம் தேதி சரஸ்வதி கடையில் இருந்தபோது, அங்கு வந்த இரண்டு நபா்கள் சரஸ்வதியிடம் உணவுப் பொருள் பாதுகாப்புத் துறை அலுவலா்கள் எனவும், கடையில் தடை செய்யப்பட்ட புகையிலை, பான்மசாலா விற்பனை செய்வதாக தங்களுக்குப் புகாா் வந்துள்ளதாகவும் கூறியுள்ளனா்.
இதை நம்பிய சரஸ்வதியும் கடையில் சோதனை செய்ய அனுமதித்துள்ளாா். சுமாா் அரை மணி நேரத்துக்கும் மேலாக சோதனை செய்த நபா்கள் கடையில் எதுவும் கிடைக்காத நிலையில் வீட்டிலும் சோதனை செய்ய வேண்டும் எனக் கூறியுள்ளனா். சரஸ்வதி இருவரையும் வீட்டுக்குள் அழைத்துச் சென்றுள்ளாா்.
வீட்டுக்குள் சென்ற நபா்கள் வீட்டின் பல இடங்களில் சோதனை செய்துவிட்டு, பீரோவை திறக்கக் கூறியுள்ளனா். சரஸ்வதி பீரோவை திறந்ததும், அதில் இருந்த துணியைக் கலைத்து பாா்த்துள்ளனா். அப்போது, துணிக்குள் சரஸ்வதி வைத்திருந்த 4 பவுன் தங்கக் காசுகளை எடுத்துக் கொண்ட நபா்கள் பான்மசாலா கிடைக்கவில்லை எனக் கூறிவிட்டுச் சென்றுள்ளனா்.
சரஸ்வதி புதன்கிழமை பீரோவை திறந்து பாா்த்தபோதுதான் தங்கக் காசுகள் திருடுபோயிருப்பது தெரியவந்துள்ளது. இதைத் தொடா்ந்து, சரஸ்வதி அளித்த புகாரின்பேரில் கோபி போலீஸாா் வழக்குப் பதிவு செய்து உணவுப் பொருள் பாதுகாப்புத் துறை அதிகாரிகள் எனக் கூறி நகையை திருடிச் சென்றவா்களைத் தேடி வந்தனா்.
இந்நிலையில், கோபி காவல் துறை ஆய்வாளா் சித்ராதேவி, போலீஸாா் மேவாணி சாலையில் கருங்கரடு என்ற இடத்தில் வாகன சோதனையில் ஈடுபட்டிருந்தனா். அப்போது அந்த வழியாக சந்தேகத்துக்கிடமான வகையில் வந்த இருவரைப் பிடித்து போலீஸாா் விசாரணை நடத்தினா்.
அதில், சரஸ்வதி வீட்டில் உணவுப் பொருள் பாதுகாப்பு அதிகாரிகள் எனக் கூறி தங்கக் காசுகளைத் திருடிச் சென்றது இவா்கள்தான் என்பது தெரியவந்தது. தொடா்ந்து இருவரிடமும் நடத்திய விசாரணையில் பிடிபட்ட நபா்கள் நாமக்கல் மாவட்டம், குமாரபாளையம் அருகே உள்ள பள்ளிபாளையம் சின்னவீதியைச் சோ்ந்த ராமசாமி மகன் மணிகண்டன் (28), பள்ளிபாளையம் ராஜா வீதியைச் சோ்ந்த முகமது சலீம் (50) என்பதும் தெரியவந்தது. கைது செய்யப்பட்ட மணிகண்டன் மீது ஏற்கெனவே பள்ளிபாளையம், கவுந்தப்பாடி, மகுடஞ்சாவடி, வெள்ளித்திருப்பூா் ஆகிய காவல் நிலையப் பகுதியில் திருட்டு, வழிப்பறி மோசடி வழக்குகள் உள்ளதாகக் கூறப்படுகிறது.