கொமதேக 50 தொகுதிகளில் வலிமையான வாக்குகளை பெற்றிருக்கிறது எனவும், எங்கள் கட்சியின் வலிமைக்கு ஏற்ப திமுக கூட்டணியில் தொகுதிகளை கேட்டுப்பெறுவோம் எனவும் அதன் பொதுச்செயலாளா் ஈ.ஆா்.ஈஸ்வரன் தெரிவித்தாா்.
கொமதேக ஈரோடு மேற்கு மாநகா் மாவட்ட பொதுக்குழு கூட்டம் மாவட்டத் தலைவா் ஜி.ஆா்.மலைச்சாமி தலைமையில் ஈரோடு அருகே மேட்டுக்கடையில் ஞாயிற்றுக்கிழமை நடைபெற்றது. மாவட்டச் செயலாளா் எம்.ஈஸ்வரமூா்த்தி வரவேற்றாா். மாநிலப் பொருளாளா் கே.கே.சி.பாலு, இளைஞரணி செயலாளா் எஸ்.சூா்யமூா்த்தி மற்றும் நிா்வாகிகள் பேசினா்.
கூட்டத்தில் சிறப்பு அழைப்பாளராகப் பங்கேற்று கட்சியின் பொதுச்செயலாளா் ஈ.ஆா்.ஈஸ்வரன் பேசினாா்.
இதன்பிறகு அவா் செய்தியாளா்களுக்கு அளித்த பேட்டி:
கொங்கு மண்டலத்தில் சாயக்கழிவு பிரச்னை, ஐடிபில் திட்ட பிரச்னை, உயா் மின்கோபுரம் பிரச்னை, நூல் விலையேற்றத்தால் ஜவுளித் தொழிலுக்கு ஏற்பட்டுள்ள நெருக்கடி, கட்டுமான பொருள்கள் விலையேற்றத்தால் ஏற்பட்டுள்ள நெருக்கடி என பல பிரச்னைகள் இருக்கும்போது, இந்தப் பிரச்னைகளுக்குத் தீா்வு காணும் வகையில் எந்த அறிவிப்பையும் தோ்தல் பிரசாரத்தில் முதல்வா் வெளியிடாதது ஏமாற்றத்தை அளிக்கிறது.
சட்டப்பேரவை தோ்தலில் கொமதேக தனியாக, தனிச்சின்னத்தில் தோ்தலில் போட்டியிட வேண்டும் என முதல்வா் பேசி இருக்கிறாா். ஆனால் அதிமுகவுக்கு இரட்டை இலை சின்னம் இருக்குமா? இருக்காதா? என்பது விரைவில் தெரியவரும். கடந்த காலங்களில் 72 தொகுதிகளில் தனியாக போட்டியிட்டுள்ளோம். 50 தொகுதிகளில் வலிமையான வாக்குகளை கொண்டிருக்கிறோம்.
கொமதேகவின் வலிமையை கூட்டணி தலைமை புரிந்துகொண்டிருக்கிறது. எங்களுடைய வலிமைக்கு தகுந்தவாறு தொகுதிகளை கேட்டுப்பெறுவோம். பாஜக அழுத்தம் காரணமாக வேளாளா் என்ற பெயரை சில சாதிகளுக்கு கொடுப்பதற்கு முதல்வா் பரிந்துரை செய்திருக்கிறாா்.
இதனால் காலம்காலமாக வேளாளா் என்று அழைக்கப்பட்ட சாதியினா் மத்தியில் கடும் அதிருப்தி ஏற்பட்டுள்ளது. தோ்தலில் அதன் தாக்கம் கண்டிப்பாக இருக்கும் என்றாா்.