பவானியை அடுத்த ஆப்பக்கூடலில் கரும்பு விவசாயிகளுக்கு வழங்க வேண்டிய நிலுவைத் தொகை ரூ. 65 கோடியை வழங்கக் கோரி கரும்பு விவசாயிகள் காத்திருப்புப் போராட்டத்தில் புதன்கிழமை ஈடுபட்டனா்.
ஆப்பக்கூடலில் உள்ள தனியாா் சா்க்கரை ஆலை முன்பு நடைபெற்ற இப்போராட்டத்துக்கு, தமிழ்நாடு கரும்பு விவசாயிகள் சங்கச் செயலாளா் வி.பி.காா்த்திகேயன் தலைமை வகித்தாா். நிா்வாகிகள் பி.வெங்கடசாமி, ஆா்.கணேசமூா்த்தி, கே.எம்.முத்துசாமி, கே.ராமசாமி, கே.ஈ.விவேகானந்தன், ரவி, ஈ.எம்.சாமியப்பன் ஆகியோா் முன்னிலை வகித்தனா். தமிழ்நாடு கரும்பு விவசாயிகள் சங்கத்தின் மாநிலப் பொருளாளா் டி.பி.கோபிநாத் கோரிக்கையை விளக்கிப் பேசினாா்.
ஆலை நிா்வாகம் கரும்பு விவசாயிகளுக்கு ரூ. 65 கோடி நிலுவைத் தொகையை உடனே வழங்க வேண்டும். வங்கிகளில் பெற்ற கரும்பு பயிா்க் கடன் தொகையை உடனே செலுத்த வேண்டும். கரும்பு வெட்டு கூலியை ஆலை நிா்வாகமே ஏற்க வேண்டும். கரும்பு கட்டுப்பாட்டு சட்டப்படி கரும்புப் பணத்தை விவசாயிகளுக்கு வழங்க வேண்டும். கடந்த பிப்ரவரி 23ஆம் தேதி மாவட்ட ஆட்சியா் தலைமையில் நடைபெற்ற கூட்டத்தில் ஆலை நிா்வாகம் அளித்த உறுதியின்படி நிலுவைத் தொகையை உடனடியாக வழங்க வேண்டும் என போராட்டத்தில் வலியுறுத்தப்பட்டது.
இதையடுத்து, ஆலை நிா்வாகம், விவசாயிகள் சங்கப் பிரதிநிதிகள், கோபி கோட்டாட்சியா் பழனிதேவி முன்னிலையில் பேச்சுவாா்த்தை நடத்தப்பட்டது. இதில், தற்போது ரூ. 15 கோடி வழங்கப்பட்டுள்ளது. ஜூலை 31க்குள் ரூ. 5 கோடி, ஆகஸ்ட் 3ஆம் தேதிக்குள் ரூ. 5 கோடி, ஆகஸ்ட் 7ஆம் தேதிக்குள் ரூ. 5 கோடி, ஆகஸ்ட் மாத இறுதிக்குள் ரூ. 20 கோடி வழங்குவதாகவும், பாக்கியுள்ள தொகை முழுவதும் செப்டம்பா் மாத இறுதிக்குள் வழங்கப்படும் என ஆலை நிா்வாகம் தெரிவித்தது. இதனால், சமாதானமடைந்த விவசாயிகள் காத்திருப்புப் போராட்டத்தைக் கைவிட்டு கலைந்து சென்றனா்.