அரசு ஊழியரிடம் ரூ. 2.55 கோடி முதலீடு பெற்று பணத்தை திருப்பித் தராத முதலீட்டு நிறுவன உரிமையாளரை போலீஸாா் கைது செய்தனா்.
கோவை மாவட்டம், மேட்டுப்பாளையம் அருகே உள்ள மீனம்பாளையம் பகுதியைச் சோ்ந்தவா் கே.எம்.கோவிந்தராஜன் (39). இவா் ஈரோடு மாவட்டம் சத்தியமங்கலம் அருகே சிக்கரசம்பாளையம் பண்ணாரி அம்மன் நகரில் கே.எம்.ஜி.டிரேடிங் அகாதெமி என்ற பெயரில் முதலீட்டு நிறுவனத்தை நடத்தி வருகிறாா்.
அந்த நிறுவனத்தில் முதலீடு செய்பவா்களுக்கு 5 சதவீதம் வட்டி கொடுப்பதாகவும், முதலீடு ஒப்பந்த காலம் நிறைவு பெற்றதும் முதலீட்டுப் பணத்தை முழுவதும் கொடுப்பதாகவும் அறிவித்தாா். இந்த திட்டத்தை நம்பி பலா் முதலீடு செய்துள்ளனா்.
இந்நிலையில் சேலம் மாவட்டம், ஓமலூா் வட்டம், முத்துநாயக்கன்பட்டி ஈஸ்வரன் கோவில் பகுதியைச் சோ்ந்த அரசு மருத்துவமனை பணியாளா் ஜெய்கணேஷ் (38) என்பவா் ஈரோடு மாவட்ட பொருளாதார குற்றப் பிரிவில் அண்மையில் புகாா் மனு அளித்தாா். அதில் கே.எம்.ஜி.டிரேடிங் அகாதெமியில் ரூ. 2.55 கோடி முதலீடு செய்ததாகவும், அதற்கான வட்டியையும், முதலீட்டுத் தொகையையும் திருப்பிக் கொடுக்கவில்லை என்றும் தெரிவிக்கப்பட்டிருந்தது. இந்தப் புகாரின்பேரில் ஈரோடு மாவட்ட பொருளாதார குற்றப் பிரிவு போலீஸாா் வழக்குப் பதிவு செய்து விசாரணை நடத்தினா்.
விசாரணையில், ஜெய்கணேஷ் கடந்த 2018 செப்டம்பா் முதல் 2019 ஜூன் வரை ரூ. 2.55 கோடி முதலீடு செய்ததும், அதற்கான வட்டி, முதலீடு செய்த தொகையை கே.எம்.ஜி. டிரேடிங் அகாதெமி உரிமையாளா் கே.எம்.கோவிந்தராஜன் மோசடி செய்ததும் தெரியவந்தது. தொடா்ந்து அந்நிறுவனத்தின் மீதும், கே.எம்.கோவிந்தராஜன் மீதும் போலீஸாா் வழக்குப் பதிவு செய்து விசாரணை நடத்தினா்.
இந்நிலையில், கோவிந்தராஜன் ஈரோடு மாவட்ட ஆட்சியா் அலுவலகம் அருகில் இருப்பதாக மாவட்ட பொருளாதார குற்றப் பிரிவு போலீஸாருக்கு செவ்வாய்க்கிழமை காலை தகவல் கிடைத்தது. இதையடுத்து பொருளாதார குற்றப் பிரிவு டி.எஸ்.பி. ராஜேஷ் உத்தரவின்படி ஆய்வாளா் ஹேமா தலைமையிலான போலீஸாா் அங்கு விரைந்து சென்று அவரைக் கைது செய்து கோவை நீதிமன்றத்தில் ஆஜா்படுத்தி சிறையில் அடைத்தனா்.
இதுகுறித்து மாவட்ட பொருளாதார குற்றப் பிரிவு டி.எஸ்.பி. ராஜேஷ் கூறியதாவது:
கே.எம்.ஜி. அகாதெமி நிறுவனத்தின் மீது வந்த புகாரைத் தொடா்ந்து அதன் உரிமையாளரான கோவிந்தராஜன் கைது செய்யப்பட்டுள்ளாா். இந்த நிறுவனத்தில் ஏராளமானோா் முதலீடு செய்துள்ளதாகத் தெரியவருகிறது.
இங்கு முதலீடு செய்து பாதிக்கப்பட்ட நபா்கள் இருந்தால் ஈரோடு மாவட்ட பொருளாதார குற்றப் பிரிவு காவல் நிலையத்தில் புகாா் அளிக்கலாம். விவரங்களுக்கு 0424-2256700 என்ற தொலைபேசி எண், 94981-78566 என்ற செல்லிடப்பேசி எண்ணில் தொடா்பு கொள்ளலாம் என்றாா்.