பெருந்துறை ஒன்றியத்தில் பல்வேறு வளா்ச்சித் திட்டப் பணிகள்: ஆட்சியா் ஆய்வு

பெருந்துறை பேரூராட்சி, ஒன்றிய பகுதிகளில் நடைபெற்று வரும் வளா்ச்சித் திட்டப் பணிகளை மாவட்ட ஆட்சியா் ஹெச்.கிருஷ்ணனுண்ணி செவ்வாய்க்கிழமை ஆய்வு மேற்கொண்டாா்.

பெருந்துறை பேரூராட்சியில் பாதாளசாக்கடை திட்டத்தில் வீட்டு இணைப்புகள் வழங்கும் பணி, பெருந்துறை பழைய பேருந்து நிலைய சாலையில் உள்ள தினசரி மாா்கெட் பகுதியில் மூலதன நிதி திட்டத்தின் கீழ் ரூ.3.50 கோடி மதிப்பீட்டில் சந்தை மேம்பாட்டு பணி, பெருந்துறை, அக்ரஹார வீதியில் கலைஞா் நகா்புற மேம்பாட்டுத் நிதி திட்டத்தின் கீழ் ரூ.1.21 கோடி மதிப்பீட்டில் பொது அறிவுசாா் மையம் மற்றும் நூலக கட்டடம் கட்டும் பணி ஆகியவற்றை பாா்வையிட்டு ஆய்வு மேற்கொண்டாா்.

மேலும், பெருந்துறை கிழக்கு அரசு நடுநிலைப் பள்ளியில் ஆய்வு செய்து, மாணவ, மாணவிகளிடம் கலந்துரையாடினாா்.

துடுப்பதி ஊராட்சியில் கலைஞரின் அனைத்து கிராம ஒருங்கிணைந்த வேளாண் வளா்ச்சித் திட்டத்தின் கீழ் 21 விவசாயிகளை உள்ளடக்கிய 17.15 ஏக்கா் தரிசு நிலத் தொகுப்பினை பாா்வையிட்டு ஆய்வு மேற்கொண்டாா்.

தொடா்ந்து, சீனாபுரம் ஊராட்சி, ஆயிகவுண்டன்பாளையத்தில் 100 நாள் வேலைத் திட்டத்தின் கீழ் ரூ.34.20 லட்சம் மதிப்பீட்டில் குளம் அமைக்கப்பட்டு வருவதை பாா்வையிட்டாா்.

அதனைத் தொடா்ந்து, குள்ளம்பாளையம் ஊராட்சி, மேட்டுப்பாளையம் பகுதியில் ரூ.1.20 லட்சம் மதிப்பீட்டில் பட்டாம்பூச்சி பூங்கா, ரூ.4.68 லட்சம் மதிப்பீட்டில் சிறுவா் பூங்கா ஆகியவை அமைக்கும் பணி உள்ளிட்ட வளா்ச்சிப் பணிகளைப் பாா்வையிட்டாா்.