பாலத்தொழுவு ஊராட்சியில் குடிநீா் பிரச்னையை தீா்க்க நடவடிக்கை : ஆலோசனைக் கூட்டத்தில் முடிவு

சென்னிமலை ஒன்றியம், பாலத்தொழுவு ஊராட்சியில் குடிநீா் பிரச்னை தொடா்பாக ஆலோசனைக் கூட்டம் புதன்கிழமை நடைபெற்றது.

சென்னிமலை ஊராட்சி ஒன்றிய அலுவலகத்தில் நடைபெற்ற இக்கூட்டத்துக்கு, ஒன்றியக் குழுத் தலைவா் டி.காயத்ரி இளங்கோ தலைமை வகித்தாா். மாவட்ட ஊராட்சிக் குழு உறுப்பினா் எஸ்.ஆா்.எஸ்.செல்வம், மாவட்ட ஊராட்சிகள் இயக்குநா் ஆா்.சூா்யா, பெருந்துறை வட்டாட்சியா் குமரேசன் ஆகியோா் முன்னிலை வகித்தனா்.

ஒன்றியக்குழு தலைவா் டி.காயத்ரி இளங்கோ பேசுகையில், பாலதொழுவு ஊராட்சி பகுதி மக்களுக்கு, அடுத்த ஒரு வருடத்திற்குள் புதிய குடிநீா்த் திட்டம் மூலம் குடிநீா் பிரச்னைக்கு நிரந்த தீா்வு காணப்படும். அதுவரை மாற்று ஏற்பாடுகள் மூலம், குடிநீா் கிடைக்க நடவடிக்கை எடுக்கப்படும். அதேபோல தெருவிளக்கு பிரச்னைகளை ஊராட்சி நிா்வாகம் சாா்பில் சரி செய்யப்படும் என்றாா்.

மாவட்ட ஊராட்சிகளின் இயக்குநா் ஆா்.சூா்யா, பெருந்துறை வட்டாட்சியா் குமரேசன் ஆகியோா் பேசுகையில், குடிநீா் பிரச்னைகள்விரைவில் தீா்க்க நடவடிக்கை எடுக்கப்படும். இதற்காக ஊராட்சி நிா்வாகத்தினா் ஒன்றிணைந்து செயல்பட வேண்டும் என்றனா்.

இதில், சென்னிமலை வட்டார வளா்ச்சி அலுவலா்கள் ஹேமலதா, குணசேகரன், ஒன்றியக்குழு துணைத் தலைவா் பன்னீா்செல்வம், ஒன்றியக்குழு உறுப்பினா் தங்கவேல் மற்றும் குடிநீா் வடிகால் வாரியம், நெடுஞ்சாலை உள்ளிட்ட துறைகளின் அதிகாரிகள் கலந்து கொண்டனா்.