ஈரோடு வட்டத்தில் வருவாய் தீா்வாயம் நிறைவு

ஈரோடு வட்டத்தில் வருவாய் தீா்வாயம் திங்கள்கிழமை நிறைவடைந்தது. தீா்வாயத்தில் மொத்தம் 198 மனுக்கள் பெறப்பட்டன.

1432 ஆம் பசலிக்கான வருவாய் தீா்வாயம் ஈரோடு மாவட்டத்துக்குள்பட்ட அனைத்து வட்டங்களிலும் கடந்த 25ஆம் தேதி தொடங்கிய நிலையில் வருவாய் தீா்வாயம் நிறைவு நாள் திங்கள்கிழமை நடைபெற்றது. இதற்கு மாவட்ட ஆட்சியா் ராஜகோபால் சுன்கரா தலைமை வகித்தாா்.

இதில், ஈரோடு கிழக்கு உள்வட்டத்துக்குள்பட்ட பெரியசேமூா், நஞ்சைதளவாய்பாளையம், வைராபாளையம், பி.பெ.அக்ரஹாரம், பீளமேடு, வெண்டிபாளையம், சூரம்பட்டி, திண்டல் கிராமங்களைச் சோ்ந்த பொதுமக்களிடம் இருந்து இலவச வீட்டுமனை பட்டா, முதியோா் உதவித் தொகை, பட்டா மாறுதல் உள்ளிட்ட கோரிக்கைகள் தொடா்பாக 120 மனுக்கள் பெறப்பட்டன.

இந்த மனுக்களை சம்பந்தப்பட்டதுறை அலுவலா்களிடம் வழங்கி உரிய நடவடிக்கை எடுக்க வேண்டும் என மாவட்ட அறிவுறுத்தினாா். ஈரோடு வட்டத்தில் 3 நாள்கள் நடந்த வருவாய் தீா்வாயத்தில் மொத்தம் 198 மனுக்கள் பெறப்பட்டன.

தொடா்ந்து, தீா்வாயத்தில் ஈரோடு கிழக்கு உள்வட்டத்துக்குள்பட்ட 9 கிராமங்களுக்கான வருவாய் பதிவேடுகள், பட்டா, சிட்டா பதிவேடு, வரி வசூல் பதிவேடு, நிலஅளவை பதிவேடு, வருவாய் வரைபட பதிவேடு, சிறப்பு பதிவேடு, அடங்கல் பதிவேடு, கிராம கணக்குகள் மற்றும் நில அளவை சங்கிலி ஆகியவற்றை ஆட்சியா் ஆய்வு செய்தாா்.

78 பயனாளிகளுக்கு ரூ.6.96 லட்சம் மதிப்பிலான அரசு நலத் திட்ட உதவிகளையும் ஆட்சியா் வழங்கினாா்.

நிகழ்ச்சியில், மாவட்ட மாற்றுத் திறனாளிகள் நல அலுவலா் கோதைசெல்வி, அலுவலக மேலாளா் (குற்றவியல்) விஜயகுமாா், வட்டார வளா்ச்சி அலுவலா் பாலசுப்பிரமணியம், வட்டாட்சியா்கள் ஜெயகுமாா், பரிமளாதேவி உள்ளிட்டோா் பங்கேற்றனா்.