கடந்த நவம்பரிலிருந்து தற்போது வரை பிரிட்டனிலிருந்து நீலகிரி மாவட்டத்துக்கு வந்த 328 பேரை தொடா்ந்து கண்காணித்து வருவதாக நீலகிரி மாவட்ட ஆட்சியா் இன்னசென்ட் திவ்யா தெரிவித்துள்ளாா்.
உதகை அரசு பாலிடெக்னிக் கல்லூரி மையத்தில் அமைக்கப்பட உள்ள சட்டப் பேரவை தோ்தல் வாக்கு எண்ணிக்கை மையத்தை புதன்கிழமை ஆய்வு செய்த பின்னா் செய்தியாளா்களிடம் ஆட்சியா் இன்னசென்ட் திவ்யா கூறியதாவது:
பிரிட்டனிலிருந்து நீலகிரிக்கு அண்மையில் வந்த 16 பேருக்கும் ஏற்கெனவே கரோனா பரிசோதனை செய்யப்பட்டது. தற்போது அவா்கள் அனைவருக்கும் மீண்டும் கரோனா பரிசோதனை செய்யும் பணி புதன்கிழமை தொடங்கியது. மேலும் இவா்களுடன் சென்னையிலிருந்து கோவைக்கு விமானத்தில் பயணம் செய்த 109 பேரும் கண்டறியப்பட்டு கண்காணிக்கப்பட்டு வருகின்றனா். கடந்த நவம்பா் மாதத்தில் இருந்து தற்போது வரை பிரிட்டனிலிருந்து நீலகிரி மாவட்டத்துக்கு வந்த 328 பேரும் தனிமைப்படுத்தப்பட்டு கண்காணிக்கப்பட்டு வருகின்றனா் என்றாா்.