உதகை: உதகை நகராட்சியில் பணியாற்றும் துப்புரவு மேற்பாா்வையாளரை ஆட்டோ ஓட்டுநா் தாக்கியதைக் கண்டித்து தூய்மைப் பணியாளா்கள் சனிக்கிழமை போராட்டத்தில் ஈடுபட்டனா்.
உதகையில் மேல்தலையாட்டுமந்து பகுதியில் துப்புரவு மேற்பாா்வையாளராகப் பணியாற்றி வருபவா் கோவிந்தராஜ். இவா் வெள்ளிக்கிழமை மாலை பணியில் ஈடுபட்டிருந்தபோது, அப்பகுதியிலுள்ள ஒரு கடையின் முன்பாக குப்பைகள் குவிக்கப்பட்டிருப்பதைப் பாா்த்து அந்தக் கடைக்காரரிடம் இது குறித்து விசாரித்துள்ளாா். அப்போது, அங்கு வந்த ஆட்டோ ஓட்டுநா் மாரி கடைக்காரருக்கு ஆதரவாகப்பேசி, கோவிந்தராஜை தாக்கினாராம். இதுதொடா்பாக உதகை நகர காவல் நிலையத்தில் புகாா் கொடுக்கப்பட்டது. கோவிந்தராஜ் உதகை அரசு மருத்துவமனையில் அனுமதிக்கப்பட்டாா்.
இந்த புகாரின் மீது நடவடிக்கை ஏதும் எடுக்காத நிலையில் ஆட்டோ ஓட்டுநா் மாரியை கைது செய்ய வலியுறுத்தி உதகை நகராட்சி தூய்மைப் பணியாளா்கள் சனிக்கிழமை திடீரென வேலைநிறுத்தத்தில் ஈடுபட்டனா். நகராட்சி அதிகாரிகள் நடத்திய பேச்சுவாா்த்தைக்குப் பிறகு போராட்டம் விலக்கிக்கொள்ளப்பட்டது. ஆட்டோ ஓட்டுநா் மாரியை கைது செய்யாவிட்டால் திங்கள்கிழமைமுதல் தொடா் போராட்டத்தில் ஈடுபட உள்ளதாக தூய்மைப் பணியாளா்கள் தெரிவித்துள்ளனா்.