உதகை: நீலகிரி மாவட்டத்தில் உதகை, குன்னூா், நெலாக்கோட்டை ஆகிய 3 பகுதிகளில் கரோனா தடுப்பூசி ஒத்திகை சனிக்கிழமை நடைபெற்றது.
நீலகிரி மாவட்டத்தில் கரோனா தடுப்பூசி ஒத்திகை சிறப்பு முகாம் உதகையில் சேட் நினைவு அரசு மகப்பேறு மருத்துவமனை, குன்னூரில் அரசு லாலி மருத்துவமனை, நெலாக்கோட்டையில் ஆரம்ப சுகாதார நிலையம் ஆகிய 3 இடங்களில் சனிக்கிழமை நடைபெற்றது. இதில், உதகையில் சேட் நினைவு அரசு மகப்பேறு மருத்துவமனையில் கரோனா தடுப்பூசி ஒத்திகை சிறப்பு முகாமை மாவட்ட ஆட்சியா் இன்னசென்ட் திவ்யா தொடக்கிவைத்து, இப்பணிகளைப் பாா்வையிட்டாா். இதையடுத்து, அவா் செய்தியாளா்களிடம் கூறியதாவது:
மத்திய அரசின் அறிவுறுத்தலின்படி, கரோனா நோய்த் தொற்றுக்கு எதிரான தடுப்பூசி சுகாதாரப் பணியாளா்கள், முன்களப் பணியாளா்கள், 50 வயதுக்கு மேற்பட்டோா், 50 வயதுக்குள் தொற்று நோயினால் பாதிக்கப்பட்டவா்களுக்கு செலுத்தப்படும். தமிழக முதல்வரின் அறிவுறுத்தலின்படி நீலகிரி மாவட்டத்தில் அரசு மற்றும் தனியாா் மருத்துவமனைகளில் பணிபுரியும் மருத்துவா்கள்,செவிலியா்கள், களப்பணியாளா்கள், அங்கன்வாடி பணியாளா்கள், மருத்துவமனையைச் சாா்ந்த பணியாளா்களுக்கு தடுப்பூசி முதற்கட்டமாக வழங்கப்பட உள்ளது. இவா்களின் விவரங்கள் ஏற்கெனவே கோவின் இணையதளத்தில் பதியப்பட்டுள்ளது.
நீலகிரி மாவட்டத்தில் 823 தடுப்பூசி வழங்கும் மையங்கள் தோ்வு செய்யப்பட்டுள்ளது. இதில் சுமாா் 1,232 தடுப்பூசி வழங்கும் பணியாளா்கள் பட்டியலிடப்பட்டு, அவா்களுக்குத் தேவையான பயிற்சிகளும் அளிக்கப்பட்டுள்ளன. தடுப்பூசி திட்டத்தை செயல்படுத்தும்போது ஏற்படும் சவால்களை அடையாளம் கண்டு, அதனை நிவா்த்தி செய்வதே இந்த ஒத்திகையின் முக்கிய நோக்கமாகும். ஒவ்வொரு தடுப்பூசி மையத்திலும் காத்திருப்போா் அறை, தடுப்பூசி வழங்கும் அறை, கண்காணிப்பு அறை என 3 பிரிவுகளாக செயல்படவுள்ளது. சனிக்கிழமை 3 இடங்களில் நடைபெற்ற தடுப்பூசி சிறப்பு முகாம் ஒத்திகை நிகழ்வில், ஒரு மையத்தில் 25 நபா்கள் வீதம் 75 நபா்கள் பங்கேற்றனா்.
ஒவ்வொரு தடுப்பூசி மையத்திலும் பாதுகாவலா், பயனாளிகளை சரிபாா்ப்பவா், தடுப்பூசி செலுத்துபவா், கண்காணிப்பாளா்கள் என 5 நபா் கொண்ட குழுக்கள் அமைக்கப்பட்டுள்ளன. மாவட்ட தடுப்பூசி அலுவலா் தொடா் கண்காணிப்பில் ஈடுபடுவாா். ஒவ்வொரு பயனாளியும் முகாமுக்கு வரும்போது அரசு வழங்கிய அடையாள அட்டையுடன் வர அறிவுறுத்தப்பட்டுள்ளது. பயனாளியின் அடையாள அட்டையை சரிபாா்த்தவுடன் காத்திருப்போா் அறையில் அமா்த்தப்படுவாா். பின்னா் பயனாளிகளை சரிபாா்ப்பவா், பயனாளிகளின் விவரங்களை கோவின் இணையதளத்தில் சரிபாா்த்தவுடன் தடுப்பூசி செலுத்தப்படும். தடுப்பூசி செலுத்தியவுடன் அது குறித்து இணையதளத்தில் பதிவு செய்யப்படும். மேலும், தடுப்பூசி செலுத்திக்கொண்ட நபா்கள் 30 நிமிடங்கள் கண்காணிப்பாளா் அறையில் கட்டாயமாகக் காத்திருக்க வைத்து, கண்காணிக்கப்படுவாா்கள். இது தொடா்பான விவரங்கள் அறிவிப்புப் பலகைகள், சுவரொட்டிகள் மூலம் பொதுமக்களுக்கு தெரியப்படுத்தி விழிப்புணா்வு ஏற்படுத்தப்படும் என்றாா் ஆட்சியா்.
இந்நிகழ்வில், மருத்துவப் பணிகள் இணை இயக்குநா் டாக்டா் பழனிசாமி, சுகாதாரப் பணிகள் துணை இயக்குநா் டாக்டா் பாலுசாமி, உதகை அரசு தலைமை மருத்துவமனை கண்காணிப்பாளா் டாக்டா் இரியன் ரவிகுமாா் உள்பட மருத்துவா்கள், செவிலியா், அரசுப் பணியாளா்கள் கலந்து கொண்டனா்.