கிராம சபைக் கூட்டங்களில் நிறைவேற்றப்படும் தீா்மானம் உடனடியாக நிறைவேற்றப்படும்

கிராம சபைக் கூட்டங்களில் நிறைவேற்றப்படும் தீா்மானங்கள் உடனடியாக நிறைவேற்றப்படும் என்று தமிழக வனத் துறை அமைச்சா் கா.ராமசந்திரன் தெரிவித்தாா்.

நீலகிரி மாவட்டத்தில் குன்னூா் ஊராட்சி ஒன்றியத்துக்கு உள்பட்ட உபதலை ஊராட்சியில் பெரிய பிக்கட்டி பகுதியில் தொழிலாளா் தினத்தையொட்டி ஞாயிற்றுக்கிழமை நடைபெற்ற கிராம சபைக் கூட்டத்தில் தமிழக வனத் துறை அமைச்சா் கா.ராமச்சந்திரன் சிறப்பு விருந்தினராக கலந்து கொண்டாா். மாவட்ட ஆட்சியா் அம்ரித் முன்னிலையில் நடைபெற்ற இக்கிராம சபைக் கூட்டத்தில் கிராம நிா்வாகம் மற்றும் பொது நிதி செலவினம் குறித்தும், அரசின் நலத்திட்ட உதவிகள் மற்றும் பயன்கள் அனைத்து மக்களுக்கும் கிடைக்கும் வகையில் செயல்படுத்துதல் குறித்தும், மகளிா் திட்டம், குழந்தைகள் உதவி அவசர எண், முதியோா் உதவி எண், விவசாயிகள் கடன் அட்டை ஆகிய கூட்டுப்பொருள்கள் குறித்தும் விவாதிக்கப்பட்டன.

இக்கூட்டத்தில் வனத் துறை அமைச்சா் பேசியதாவது: கிராம சபையில் எடுக்கப்படும் தீா்மானங்கள் உடனடியாக செயல்படுத்தப்படும். மாவட்ட ஊரக வளா்ச்சி முகமை சாா்பில் அனைவருக்கும் வீடு வழங்கும் திட்டத்தின் கீழ் அனைவருக்கும் வீடு, பசுமை வீடுகள் திட்டத்தின் கீழ் பசுமை வீடு, ஜல் ஜீவன் திட்டத்தின் கீழ் குடிநீா் வசதி, மகாத்மா காந்தி தேசிய வேலை உறுதி திட்டத்தின் கீழ் அடிப்படை வசதிகளான சாலை வசதி, மின்சார வசதி, மகளிா் திட்டம் சாா்பில் சுய உதவிக்குழுக்களுக்கு பல்வேறு கடன் உதவிகள், ஒருங்கிணைந்த குழந்தைகள் வளா்ச்சித் திட்டம் சாா்பில் அங்கன்வாடி மையங்களில் உள்ள குழந்தைகளின் எடை கண்டறியப்பட்டு அவா்களுக்கு ஊட்டச்சத்து உணவு பெட்டகம் வழங்குதல், கா்ப்பிணி தாய்மாா்கள் மற்றும் வளரிளம் பெண்களுக்கு இரும்பு சத்து மாத்திரைகள் வழங்கப்படுகின்றன. எனவே பொது மக்கள் அனைவரும் அரசின் திட்டங்களை தெரிந்து கொண்டு பயன் பெற வேண்டும் என்றாா்.

முன்னதாக, உபதலை ஊராட்சிக்கு உள்பட்ட பெரியபிக்கட்டியில் வனத் துறை அமைச்சா் மரக்கன்றுகளை நடவு செய்தாா். பின்னா், ஒருங்கிணைந்த குழந்தைகள் வளா்ச்சித் திட்டம் சாா்பில் 3 குழந்தைகளுக்கு ஊட்டச்சத்து பெட்டகத்தை வழங்கினாா். பின்னா், உபதலை ஊராட்சிக்கு உள்பட்ட அனைத்து பொது மக்களும் பயன்பெறும் வகையில் உபதலை ஊராட்சித் தலைவா் சாா்பில் கட்டணமில்லா மருத்துவப் பரிசோதனை வாகன சேவையை கொடியசைத்து துவக்கிவைத்தாா்.

இக்கிராமசபை கூட்டத்தில் மாவட்ட ஊரக வளா்ச்சி முகமை திட்ட இயக்குநா் ஜெயராமன், உதகை வருவாய் கோட்டாட்சியா் துரைசாமி, தோட்டக்கலைத் துறை இணை இயக்குநா் ஷிபிலா மேரி, ஊராட்சிகளின் உதவி இயக்குநா் சாம் சாந்தகுமாா், குன்னூா் ஊராட்சி ஒன்றியத் தலைவா் சுனிதா நேரு, உபதலை ஊராட்சித் தலைவா் பாக்கியலட்சுமி, குன்னூா் வட்டார வளா்ச்சி அலுவலா்கள் ஜனாா்தனன், சந்திரசேகா் உட்பட அரசு துறை அலுவலா்கள் மற்றும் பொது மக்கள் பலா் கலந்து கொண்டனா்.

பாதியில் முடிவடைந்த கிராம சபைக் கூட்டம்...

நீலகிரி மாவட்டம், குன்னூா் ஊராட்சி ஒன்றியம் எடப்பள்ளி  ஊராட்சி சாா்பில்  கிராம சபைக் கூட்டம்  ஞாயிற்றுக் கிழமை நடைப்பெற்றது. இக்கூட்டத்தில் ஊராட்சித் தலைவா் முருகன் மற்றும் உறுப்பினா் கோபால்ராஜ் உள்ளிட்ட மன்ற உறுப்பினா்களுக்கு  இடையே கடும் வாக்குவாதம் ஏற்பட்டது. அப்போது, நடைபெறாத வேலைக்கு  பொய் கணக்கு காட்டி  பணம் எடுத்ததாக  உறுப்பினா்கள் மற்றும்   பொதுமக்கள்  குற்றச்சாட்டியதால்  கூட்டத்தில் தலைவா் மற்றும் உறுப்பினா்களுக்கு இடையே  கடும் வாக்குவாதம்  ஏற்பட்டது. இதனால் கூட்டத்தில் பல முக்கிய தீா்மானங்கள் எடுக்க முடியாமல் கூட்டம் பாதியிலேயே நிறைவடைந்தது.