நெசவாளா்கள் வங்கியில் வாங்கிய அனைத்து விதமான கடன்களையும் தள்ளுபடி செய்ய வேண்டும் என்று அனைத்திந்திய தேவாங்கா் ஸ்ரீ செளடேஸ்வரி நற்பணி மன்றத்தின் நெசவாளா் அணி சாா்பில் மனு அளிக்கப்பட்டுள்ளது.
இது குறித்து அந்த அணி சாா்பில் திருப்பூா் மாவட்ட ஆட்சியா் அலுவலகத்தில் திங்கள்கிழமை அளித்துள்ள மனுவில் கூறியுள்ளதாவது:
கரோனா பொதுமுடக்கம் காரணமாக தமிழகத்தில் கைத்தறி மற்றும் விசைத்தறி நெசவாளா்கள் அவதிக்குள்ளாகி வருகின்றனா். ஆகவே, நெசவாளா்களுக்கு மாதம் ரூ. 2 ஆயிரம் வீதம் ஆண்டுக்கு ரூ.24 ஆயிரம் நிவாரணத் தொகை வழங்க வேண்டும். விவசாயத்துக்கு வழங்குவதைப் போல நெசவுத் தொழிலுக்கும் சலுகைகள் வழங்க வேண்டும். நெசவாளா்கள் வங்கிகளில் வாங்கியுள்ள அனைத்துவிதமான கடன்களையும் தள்ளுபடி செய்ய வேண்டும். கைத்தறி நெசவுத் தொழில் செய்யும் அனைவருக்கும் இலவச மின்சாரம் வழங்க வேண்டும். உள்நாட்டில் உற்பத்தியாகும் துணிகளுக்கு முக்கியத்துவம் வழங்கினால் மட்டுமே ஜவுளிகளின் தேவை அதிகரிப்பதுடன், நெசவுத் தொழில் சீரடையும். ஆகவே, ஜவுளி ரகங்கள் இறக்குமதிக்கு கட்டுப்பாடுகள் விதிக்க வேண்டும். விவசாயிகளைப்போல நெசவாளா்களுக்கும் குறைதீா் கூட்டம் நடத்த வேண்டும் என்று தெரிவிக்கப்பட்டுள்ளது.
டாஸ்மாக் கடை திறக்க எதிா்ப்பு:
திருப்பூா் மாநகராட்சி, 17 ஆவது வாா்டுக்கு உள்பட்ட அண்ணா நகா் வடக்குப் பகுதி பொதுமக்கள் அளித்துள்ள மனுவில் கூறியுள்ளதாவது: எங்களது பகுதியில் உள்ள நியூ காமராஜ் நகா், சோழன் நகா், ஜே.பி.நகா், அம்மன் நகா், ஜி.என்.நகா் ஆகிய பகுதிகளில் 300க்கும் மேற்பட்ட குடும்பத்தினா் வசித்து வருகிறோம். இந்தப் பகுதியில் அரசு பள்ளி, 2 தனியாா் பள்ளிகள் செயல்பட்டு வருகின்றன. இப்பகுதியில் டாஸ்மாக் கடையில் உள்ள நிலையில் புதிதாக மேலும் ஒரு டாஸ்மாக் கடை திறக்கத் நடவடிக்கை மேற்கொள்ளப்பட்டு வருகிறது. இந்தப் பகுதியில் டாஸ்மாக் கடை திறந்தால் பள்ளிக்கு செல்லும் மாணவ, மாணவியா் மற்றும் குடியிருப்பு வாசிகளுக்கு இடையூறை ஏற்படுத்தும். ஆகவே, இந்தப் பகுதியில் டாஸ்மாக் கடை திறக்கும் முடிவைக் கைவிட வேண்டும் என்று தெரிவிக்கப்பட்டுள்ளது.
பொதுவழித்தட ஆக்கிரமிப்பை அகற்றக் கோரிக்கை:
உடுமலை வட்டம், கோட்டமங்கலம் ஊராட்சிக்கு ஊா் கிழக்குப் பகுதி பொதுமக்கள் சாா்பில் அளித்துள்ள மனுவில் கூறியுள்ளதாவது:
கோட்டமங்கலம் ஊராட்சியின் கிழக்குப் பகுதியில் 100க்கும் மேற்பட்ட குடும்பத்தினா் வசித்து வருகிறோம். இந்தப் பகுதியில் பூா்வீகமாகப் பயன்படுத்தி வரும் பொது வழித்தடத்தில் உள்ள ஆக்கிரமிப்புகளால் மழை நீா் தேங்குகிறது. கடந்த சில நாள்களுக்கு முன்பாக போடப்பட்ட மெட்டல் சாலையும் சேதமடைந்துள்ளது. இது தொடா்பாக ஊராட்சி தலைவரிடம் முறையிட்டும் எந்தவிதமான நடவடிக்கையும் எடுக்கவில்லை. ஆகவே, பொது வழித்தடத்தில் உள்ள ஆக்கிரமிப்புக்களை அகற்ற நடவடிக்கை எடுக்க வேண்டும் என்று தெரிவிக்கப்பட்டுள்ளது.
தொலைபேசி குறைகேட்புக் கூட்டத்தில் 102 அழைப்புகள்:
திருப்பூா் மாவட்ட ஆட்சியா் அலுவலகத்தில் தொலைபேசி வாயிலாக குறைகேட்புக் கூட்டம் ஆட்சியா் க.விஜயகாா்த்திகேயன் தலைமையில் திங்கள்கிழமை நடைபெற்றது. இதில், பொதுமக்களிடமிருந்து வீட்டுமனைப் பட்டா, சாலை வசதி, குடிநீா் வசதி, முதியோா் உதவித் தொகை உள்ளிட்ட பல்வேறு கோரிக்கைகள் தொடா்பாக 102 அழைப்புகள் வரப்பெற்றன. இந்த அழைப்புகளின் மீது உரிய நடவடிக்கை எடுக்கும்படி சம்பந்தப்பட்ட அலுவலா்களை ஆட்சியா் அறிவுறுத்தினாா்.
இந்தக் கூட்டத்தில் , மாவட்ட வருவாய் அலுவலா் கு.சரவணமூா்த்தி, சமூக பாதுகாப்புத் திட்ட தனித் துணை ஆட்சியா் (பொறுப்பு) வாசுகி உள்ளிட்ட பலா் கலந்து கொண்டனா்.