அவிநாசி பழைய பேருந்து நிலையம் அருகே பூட்டியிருந்த செல்லிடப்பேசி விற்பனைக் கடையில் இருந்து செல்லிடப்பேசிகளைத் திருடியவரை போலீஸாா் செவ்வாய்க்கிழமை கைது செய்தனா்.
அவிநாசி புதிய பேருந்து நிலையம் அருகே போலீஸாா் வாகனச் சோதனையில் ஈடுபட்டிருந்தனா். அப்போது, சந்தேகப்படும்படியாக நின்று கொண்டிருந்த நபரை போலீஸாா் பிடித்து விசாரணை மேற்கொண்டனா்.
அவா் திருநெல்வேலி மருதகுளம், மேலத்தோட்டக்குடி செல்லய்யா மகன் ஆவுடையப்பன்(50) என்பதும், அவிநாசி பழைய பேருந்து நிலையம் அருகே உள்ள செல்லிடப்பேசி விற்பனை நிலையத்தின் மேற்கூரையைப் பிரித்து செல்லிடப்பேசிகளைத் திருடியதும் தெரியவந்தது. மேலும், அவா் அவிநாசி புதிய பேருந்து நிலையம் பகுதியில் திருடிய செல்லிடப்பேசிகளை விற்க முயன்றதும் தெரியவந்தது. இதையடுத்து, அவிநாசி போலீஸாா் வழக்குப் பதிவு செய்து ஆவுடையப்பனை கைது செய்தனா்.