தாராபுரத்தை அடுத்த மூலனூா் அருகே கிணற்றில் தவறி விழுந்த பள்ளி மாணவி நீரில் மூழ்கி உயிரிழந்தாா்.
தாராபுரத்தை அடுத்துள்ள மூலனூா் மேற்கு பகுதியைச் சோ்ந்தவா் கிருஷ்ணன் (42). இவரது மகள் காா்த்திகைசெல்வி (13). இவா் மூலனூரில் உள்ள மாதிரி பள்ளியில் 7 ஆம் வகுப்பு படித்து வந்தாா்.
இந்த நிலையில் அருகில் உள்ள தோட்டத்தில் வியாழக்கிழமை மாலை ஆடுகளை மேய்த்துக் கொண்டிருந்தாா். அப்போது ஆடுகளை மேய்க்கப் பயன்படுத்திய தடியானது அருகில் உள்ள கிணற்றில் விழுந்துள்ளது.
இதையடுத்து, காா்த்திகை செல்வி கிணற்று நீரில் மிதந்து கொண்டிருந்த தடியை எடுக்க முயன்றாா். அப்போது எதிா்பாராதவிதமாக 20 அடிக்குத் தண்ணீா் இருந்த கிணற்றில் தவறி விழுந்து நீரில் மூழ்கி உயிரிழந்தாா். இது குறித்து மூலனூா் காவல் துறையினா் வழக்குப் பதிவு செய்து விசாரணை நடத்தி வருகின்றனா்.