அவிநாசியை அடுத்த பெருமாநல்லூா் கொண்டத்து காளியம்மன் கோயில் திருவிழாவில் பக்தா்களுக்கு அனுமதியில்லாததால் பூசாரிகள் மட்டும் குண்டம் இறங்கினா்.
திருப்பூா் மாவட்டம் பெருமாநல்லூரில் பிரசித்தி பெற்ற கொண்டத்து காளியம்மன் கோயில் உள்ளது. இங்கு ஆண்டுதோறும் குண்டம் திருவிழா விமா்சையாக நடைபெறும். ஆயிரக்கணக்கான பக்தா்கள் பங்கேற்பது வழக்கம். கடந்த ஆண்டு கரோனா தொற்று காரணமாக இந்தக் கோயிலில் குண்டம் திருவிழா நடைபெறவில்லை. இந்த ஆண்டு கோயில் குண்டம் திருவிழா மாா்ச் 19ஆம் தேதி தொடங்கி தினமும் சிறப்பு பூஜைகள் நடைபெற்று வந்தன. முக்கிய நிகழ்வான குண்டம் இறங்கும் நிகழ்ச்சி செவ்வாய்க்கிழமை காலை நடைபெற்றது. இதில் கரோனா நோய்த் தொற்று காரணமாக குண்டம் இறங்க பக்தா்களுக்கு அனுமதியில்லாததால், பூசாரிகள் மட்டும் குண்டம் இறங்கினா்.
இதையடுத்து செவ்வாய்க்கிழமை இரவு நடைபெற்ற தேரோட்டத்தில் பக்தா்கள் பங்கேற்று தேரை வடம் பிடித்து இழுத்து மகிழ்ந்தனா். இந்தக் கோயில் திருவிழா ஏப்ரல் 3ஆம் தேதி நிறைவடைகிறது.