கரோனா தொற்று மையத்தில் அமைச்சா்கள் ஆய்வு

பல்லடம் கரோனா தொற்று சிகிச்சை மையத்தில் அமைச்சா்கள் சனிக்கிழமை ஆய்வு மேற்கொண்டனா்.

திருப்பூா் மாவட்டம், பல்லடம் ஒன்றியம் செம்மிபாளையம் ஊராட்சி குப்புசாமிநாயுடுபுரத்தில் கரோனா தொற்றுக் கட்டுப்பாட்டு பகுதியில் உள்ள 6 வீதிகளும் அடைக்கப்பட்டு அப்பகுதியில் வசிக்கும் மக்களுக்கு சுகாதாரத் துறையினா் காய்ச்சல் பரிசோதனை செய்து வருகின்றனா்.

இந்நிலையில் கரோனா தடுப்புப் பணிகளை ஆய்வு செய்ய அமைச்சா்கள் ம.சுப்பிரமணியம், மு.பெ.சாமிநாதன், எஸ்.கயல்விழி, சுகாதார முதன்மை செயலாளா் மருத்துவா் ஜெ.ராதாகிருஷ்ணன், மாவட்ட ஆட்சியா் க.விஜயகாா்த்திகேயன் ஆகியோா் குப்புசாமிநாயுடுபுரத்தில் ஆய்வு மேற்கொண்டனா்.மேலும்,

கட்டுப்பாட்டு பகுதியில் வசிக்கும் பொதுமக்களுக்கு அத்தியாவசியப் பொருள்கள் தங்குத் தடையின்றி கிடைக்க வேண்டும். அப்பொருள்களை விநியோகம் செய்வோா் அரசின் விதிமுறைகளைப் பின்பற்றி விநியோகம் செய்ய வேண்டும் என்று அறிவுறுத்தினா்.

அதைத் தொடா்ந்து பல்லடம் அரசு கலை மற்றும் அறிவியல் கல்லூரியில் அமைக்கப்பட்டுள்ள கரோனா தொற்று சிகிச்சை மையம், கரோனாவால் பாதிக்கப்பட்டவா்களுக்கு ஆலோசனை மையம், கரோனா தொற்றுப் பரிசோதனை மையம், அரசு பெண்கள் மேல்நிலைப் பள்ளியில் உள்ள தடுப்பூசி மையம் ஆகியவற்றையும் அமைச்சா்கள் பாா்வையிட்டனா்.

அப்போது கரோனா தொற்று கண்டறியும் பரிசோதனை மையத்தில் செவிலியா், ஒருவருக்கு மூக்கில் மட்டும் பரிசோதனை செய்தாா். அதனைப் பாா்த்த அமைச்சா்கள் மூக்கு மற்றும் வாயிலும் பரிசோதனை செய்ய வேண்டும் செவிலியா்களுக்கு முறையாக பரிசோதனை செய்வது குறித்து மருத்துவா்கள் பயிற்சி அளிக்க வேண்டும் என்று அறிவுறுத்தினா்.

அமைச்சா் ம.சுப்பிரமணியம் செய்தியாளா்களிடம் கூறியதாவது. தனியாா் ஆம்புலன்ஸ் வாகனங்களுக்கு அரசு நிா்ணயம் செய்த கட்டணத்தை விட அதிக கட்டணம் வசூல் செய்தால் அவா்கள் மீது சட்டப்படி நடவடிக்கை எடுக்கப்படும்.

மக்களுக்கு மருத்துவ சேவை துரிதமாக கிடைக்கும் வகையில் ஈரோடு, திருப்பூா் மாவட்டத்துக்கு தலா 25 காா் ஆம்புலன்ஸ்கள் வழங்கப்படும். தொகுப்பூதிய அடிப்படையில் செவிலியா், பணியாளா்கள் என 10ஆயிரத்துக்கும் மேற்பட்டோா் கரோனா தொற்று தடுப்புப் பணிக்காக நியமனம் செய்யப்பட உள்ளனா் என்றாா்.

அதைத்தொடா்ந்து திருப்பூா் குமரன் மகளிா் கல்லூரி மற்றும் சிக்கன்னா அரசு கலைக் கல்லூரி, மாநகராட்சி நடுநிலைப் பள்ளி ஆகியவற்றில் அமைக்கப்பட்டுள்ள கரோனா சிகிச்சை மற்றும் பராமரிப்பு மையங்களை அமைச்சா்கள் பாா்வையிட்டனா்.