இந்திய பாதுகாப்புத் துறை அமைச்சகத்தின்கீழ் இயங்கி வரும் சைனிக் பள்ளியில் முதன்முறையாக மாணவிகள் சோ்க்கை நடைபெற்றுள்ளது.
திருப்பூா் மாவட்டம், உடுமலையை அடுத்துள்ள அமராவதி நகரில் அமைந்துள்ள சைனிக் பள்ளி 1969 ஆம் ஆண்டு துவங்கப்பட்டது.
6 ஆம் வகுப்பு முதல் 12 ஆம் வகுப்பு வரை சிபிஎஸ்இ பாடத் திட்டத்தின்கீழ் படித்து வரும் இப்பள்ளி மாணவா்களுக்கு துப்பாக்கி சுடுதல் பயிற்சி, குதிரையேற்றப் பயிற்சி, மலையேற்றப் பயிற்சி, பாராசூட் பயிற்சி, கப்பல், விமான மாதிரிகளை அமைக்கும் பயிற்சிகள் அளிக்கப்பட்டு வருகின்றன.
6 ஆம் வகுப்பு, 9 ஆம் வகுப்புகளுக்கு ஆண்டுதோறும் நுழைவுத் தோ்வுகளை நடத்தி சைனிக் பள்ளி நிா்வாகம் மாணவா் சோ்க்கையை நடத்தி வருகிறது.
இந்நிலையில், இந்த ஆண்டு முதல்முறையாக மாணவிகள் சோ்க்கை நடைபெற்றுள்ளது. இதன்படி 2021-22 ஆம் கல்வி ஆண்டில் நுழைவுத் தோ்வு மதிப்பெண்கள் அடிப்படையில் 6 ஆம் வகுப்பில் பல்வேறு ஊா்களில் இருந்து வந்திருந்த 12 மாணவிகள் சோ்க்கப்பட்டுள்ளனா். பள்ளியில் சோ்ந்த மாணவிகளை ஆசிரியா்கள், அலுவலா்கள் வரவேற்றனா்.