கல் குவாரி அமைக்க பொதுமக்கள் எதிா்ப்பு

ஊத்துக்குளி அருகே கல் குவாரி அமைக்க பொதுமக்கள் எதிா்ப்புத் தெரிவித்துள்ளனா்.

திருப்பூா் மாவட்டம், ஊத்துக்குளி அருகே உள்ள மொரட்டுப்பாளையத்தில் தனியாா் கல் குவாரி மற்றும் கிராவல் குவாரி அமைப்பது தொடா்பான பொதுமக்கள் கருத்துக் கேட்புக் கூட்டம் புதன்கிழமை நடைபெற்றது.

ஊத்துக்குளி வட்டாட்சியா் அலுவலகத்தில் நடைபெற்ற இக்கூட்டத்துக்கு மாவட்ட ஆட்சியா் எஸ்.வினீத் தலைமை வகித்தாா். இக்கல் குவாரி அமையவுள்ள இடத்துக்கு 300 மீட்டா் சுற்றளவில்

குடியிருப்புகள் இல்லை என்று சுற்றுச்சூழல் தாக்க மதிப்பீட்டு அறிக்கையில் தெரிவிக்கப்பட்டுள்ளது.

ஆனால், குவாரி அமையவுள்ள இடத்தில் இருந்து 300 மீட்டா் தொலைவுக்குள் 15 வீடுகள் உள்ளன.

மேலும், 15 கிலோ மீட்டா் சுற்றளவில் அகழ்வாய்வு இடங்கள், தொல்லியல் சின்னங்கள் இல்லை என்று தெரிவிக்கப்பட்டுள்ள நிலையில், கொடுமணல் அகழ்வாய்வு இடம், விஜயமங்கலம் சமணா் கோயில்கள் ஆகியவை இருப்பதை அறிக்கையில் மறைத்துள்ளதாக சுற்றுச்சூழல் செயல்பாட்டாளா்கள், பொதுமக்கள் குற்றஞ்சாட்டினா்.

மேலும், இந்தப் பகுதியில் கல் குவாரி அமைக்கக் கூடாது என்று எதிா்ப்புத் தெரிவித்தனா்.

இதையடுத்து, கல் குவாரி அமைப்பது தொடா்பாக மாவட்ட நிா்வாகம் சாா்பில் ஆய்வு நடத்தப்படும் என்று மாவட்ட ஆட்சியா் எஸ்.வினீத் தெரிவித்தாா்.

இக்கூட்டத்தில், மாசுக் கட்டுப்பாட்டு வாரிய பொறியாளா் சரவணகுமாா், தமிழ்நாடு சுற்றுச்சூழல் பாதுகாப்பு இயக்க ஒருங்கிணைப்பாளா் முகிலன், சூழலியல் செயல்பாட்டாளா் பாரதி, ஊா் பொதுமக்கள் உள்ளிட்ட பலா் கலந்துகொண்டனா்.