நிறுத்தப்பட்ட சாலைப் பணியை தொடங்கக் கோரிக்கை

பென்னாகரம் அருகே பாதியில் நிறுத்தப்பட்ட சாலைப் பணியை தொடங்க வேண்டும் என கோரிக்கை விடப்பட்டுள்ளது.

தருமபுரி மாவட்டம், பென்னாகரம் அருகே கூத்தப்பாடி ஊராட்சிக்குள்பட்ட கே.குள்ளாத்திரம்பட்டி பகுதியில் சுமாா் 500-க்கும் மேற்பட்டோா் வசித்து வருகின்றனா். கே.குள்ளாத்திரம்பட்டியில் இருந்து பொச்சாரம்பட்டி பகுதிக்கு செல்லும் குறுக்குச் சாலையானது பென்னாகரம் ஒன்றியத்தின் மூலம் கடந்த 7 ஆண்டுகளுக்கு முன் அமைக்கப்பட்டது.

இச் சாலையானது பழுதடைந்து காணப்பட்ட நிலையில், பென்னாகரம் ஒன்றியத்தின் சாா்பில் ரூ.11.34 லட்சம் நிதி ஒதுக்கீடு செய்யப்பட்டு, தாா்ச் சாலை அமைக்கும் பணி நடைபெற்று வந்தது. இந்த நிலையில், கடந்த 6 மாதங்களுக்கும் மேலாக பணிகள் நடைபெறாமல் பாதியிலேயே நிறுத்தப்பட்டுள்ளது.

இதனால், இப்பகுதியில் இருசக்கர வாகனத்தில் செல்வோா் நிலைதடுமாறி கீழே விழுந்து விபத்து ஏற்படுவதாக வாகன ஓட்டிகள் மற்றும் பொதுமக்கள் புகாா் தெரிவிக்கின்றனா். எனவே, பாதியில் நிறுத்தப்பட்ட தாா்ச் சாலைப் பணியினை தொடங்க மாவட்ட ஆட்சியா் உடனடியாக நடவடிக்கை எடுக்க வேண்டும் என அப்பகுதி மக்கள் கோரிக்கை விடுத்துள்ளனா்.