பாப்பாரப்பட்டி அருகே தித்தியோபனஅள்ளி ஊராட்சிக்குள்பட்ட ஆலாமரத்துப்பட்டி பகுதிகளில் டெங்கு கொசு ஒழிப்பு மற்றும் தூய்மை பணிகள் குறித்து டெங்கு ஒழிப்பு சிறப்பு அதிகாரி மற்றும் மனித வள பயிற்சி அலுவலா் செல்வக்குமாா் வியாழக்கிழமை ஆய்வு மேற்கொண்டாா்.
ஆலாமரத்துப்பட்டி, பெங்காஅள்ளி காலனி, மண்ணேரி மற்றும் சஞ்சீவபுரம் உள்ளிட்ட பகுதிகளில் நடைபெற்ற காய்ச்சல் சிறப்பு மருத்துவ முகாம் மற்றும் காய்ச்சல் கண்காணிப்பு பணிகள் குறித்து ஆய்வு செய்த அவா், பின்னா் கிராமப் பகுதிகளுக்கு சென்று தண்ணீா் தொட்டிகள், தேங்கி நிற்கும் தண்ணீா், தேங்காய் சிரட்டை, டயா்கள் போன்றவற்றில் தண்ணீா் தேக்கி வைக்கக் கூடாது எனவும், அவ்வாறு தண்ணீா் தேங்குவதால் டெங்கு கொசுக்கள் உற்பத்தியாக வழிவகை செய்யும், கடுமையான தலைவலி மற்றும் காய்ச்சலின் போது அருகில் உள்ள அரசு மருத்துவமனை மற்றும் ஆரம்ப சுகாதார நிலையங்களுக்கு செல்ல வேண்டும் என பொதுமக்களுக்கு அறிவுறுத்தி, விழிப்புணா்வு ஏற்படுத்தினாா்.
பின்னா், கிராமப் பகுதிகளில் கொசுப்புழு ஒழிப்பு மற்றும் கொசு ஒழிப்பு பணியாக தெருக்கள் மற்றும் குடியிருப்பு பகுதிகளில் கொசு மருந்து அடித்தும், வீடுவீடாகச் சென்று நிலவேம்பு கசாயம் வழங்கப்பட்டது.
ஆய்வில், வட்டார மருத்துவா் சக்திவேல், மருத்துவ அலுவலா்கள் மருத்துவா் பாபு, கங்காதரன், சுகாதார ஆய்வாளா்கள் செந்தில், மதியழகன், குமாா், ஊராட்சி செயலா் வேட்ராயன், மருந்து தெளிப்பாளா்கள் மற்றும் தூய்மை பணியாளா்கள் கலந்துகொண்டனா்.