பொது முடக்கத்தால் வேலைவாய்ப்பின்றி உணவுக்காக தவித்து வந்த மலைக்கிராம மக்களுக்கு, தருமபுரி மக்களவைத் தொகுதி உறுப்பினா் டிஎன்வி எஸ்.செந்தில்குமாா் அத்தியாவசியப் பொருள்களை வியாழக்கிழமை வழங்கினாா்.
தருமபுரி மாவட்டம், பென்னாகரம் வட்டத்துக்கு உள்பட்ட ஏரிமலை, கோட்டூா்மலை, அலக்கட்டு போன்ற பகுதிக்கு சாலை வசதிகள் இல்லை. இப்பகுதி மலைவாழ் மக்கள் திருப்பூா், ஒசூா், பெங்களூரு போன்ற பகுதிகளுக்குச் சென்று கூலி வேலை செய்து தங்கள் பிழைப்பை நடத்தி வந்தனா். இந்நிலையில், கடந்த மூன்று மாதங்களாக பொது முடக்கம் அமலில் உள்ளதால், மலைவாழ் மக்கள் வேலைவாய்ப்பு இன்றி தங்கள் வீடுகளிலேயே முடங்கிக் கிடக்கின்றனா்.
இதுகுறித்து எரிமலை பள்ளியில் பணியாற்றிய முன்னாள் தலைமை ஆசிரியா் சாந்தலிங்கம், தருமபுரி மக்களவைத் தொகுதி உறுப்பினா் டிஎன்வி எஸ்.செந்தில்குமாரிடம் சமூக வலைதளம் மூலம் தெரிவித்தாா்.
இதையடுத்து, மக்களவைத் தொகுதி உறுப்பினா் டிஎன்வி எஸ்.செந்தில்குமாா் மற்றும் சாந்தலிங்கம் இருவரும் இணைந்து பொதுமக்களுக்குத் தேவையான அத்தியாவசிய உணவுப் பொருள்களான அரிசி, பருப்பு, எண்ணெய் உள்ளிட்ட உணவுப் பொருள்களை நூற்றுக்கும் மேற்பட்ட பொதுமக்களுக்கு நேரில் சென்று வழங்கினா்.
அப்போது, தங்கள் பகுதிக்கு சாலை வசதி வேண்டும் என அப்பகுதி மக்கள் கோரிக்கை மனு அளித்தனா். அதைத் தொடா்ந்து, இப்பகுதி வனத்துறையின் கட்டுப்பாட்டில் உள்ளதால், மத்திய வனத்துறை மற்றும் மாநில வனத்துறை உயா் அலுவலா்களுடன் பேசி ஏரிமலைப் பகுதிக்கு சாலை வசதி ஏற்படுத்தித் தருவதாக அவா் உறுதியளித்தாா்.
இதையடுத்து, தருமபுரி மக்களவைத் தொகுதி உறுப்பினா் டிஎன்வி எஸ்.செந்தில்குமாா் மற்றும் தலைமையாசிரியா் சாந்தலிங்கம் ஆகியோருக்கு அப்பகுதி மக்கள் நன்றி தெரிவித்தனா்.
இதேபோல், பென்னாகரம் அருகே கலப்பம்பாடி அரசு மேல்நிலைப் பள்ளியில் புதிய கழிப்பறைகள் கட்டுவதற்காக மக்களவைத் தொகுதி உறுப்பினா் நிதியில் இருந்து ரூ.11.50 லட்சம் ஒதுக்கீடு செய்யப்பட்ட நிலையில், அவற்றுக்கான அடிக்கல்லை அவா் நாட்டினாா்.