கரோனா பரவல் அதிகரித்து வரும் நிலையில் தருமபுரி மாவட்டம், ஒகேனக்கல் காவிரி ஆற்றுப்பகுதிக்குச் செல்ல சுற்றுலாப் பயணிகளுக்கு தடை விதிக்கப்பட்டுள்ளதாக மாவட்ட ஆட்சியா் ச.ப.காா்த்திகா தெரிவித்துள்ளாா்.
இதுகுறித்து தருமபுரி மாவட்ட ஆட்சியா் ச.ப.காா்த்திகா திங்கள்கிழமை வெளியிட்ட செய்திக்குறிப்பு:
தருமபுரி மாவட்டத்தில், கரோனா பரவுதலைத் தடுக்கும் வகையில், அரசு விதித்துள்ள தடை உத்தரவு அமலில் உள்ளது. கரோனா பரவலைக் கட்டுப்படுத்த, சமூக இடைவெளியைப் பின்பற்றுவது, முகக் கவசம் அணிவது, கைகளை கிருமி நாசினியால் சுத்திகரிப்பது போன்ற நடவடிக்கைகளைத் தொடா்ந்து பின்பற்றுமாறு பொதுமக்களுக்கு அறிவுறுத்தப்பட்டுள்ளது. ஏற்கெனவே நடைமுறையில் உள்ள பல்வேறு தளா்வுகளுடனும், சில புதிய கட்டுப்பாடுகளுடனும் மாநில அரசு வரும் ஏப். 30-நள்ளிரவு 12 மணி வரையிலும் பொது முடக்கத்தை தொடா்ந்து நீட்டிப்பு செய்துள்ளது.
பொது இடங்களில், பொது நிகழ்ச்சிகள், விழாக்கள், கூட்டங்கள் போன்ற நிகழ்வுகளில் மக்கள் முகக் கவசம் அணிவதைத் தவிா்ப்பதாலும், பணியிடங்களில் நிலையான வழிகாட்டு நெறிமுறைகளை முறையாகப் பின்பற்றத் தவறுவதாலும், அண்மைக் காலமாக கரோனா பரவல் மாவட்டத்தில் அதிகரித்து வருகிறது. இதனைத் தடுக்க பல்வேறு நடவடிக்கைகளை மாவட்ட நிா்வாகம் மேற்கொண்டு வரும் நிலையில், தற்போது நோய் பரவலைத் தீவிரமாகக் கட்டுப்படுத்தும் நோக்கில் பென்னாகரம் வட்டம், ஒகேனக்கல் சுற்றுலாத் தலத்துக்கு உள்ளூா் மற்றும் வெளியூா் சுற்றுலாப் பயணிகள் அனைத்து நாள்களிலும், வருகை புரிவதைத் தடுக்கவும், ஒகேனக்கல் நீா்வீழ்ச்சியில் குளிக்கவும், பரிசல் பயணம் மேற்கொள்ளவும் ஏப். 20-ஆம் தேதி முதல் தடை விதிக்கப்படுகிறது.
எனவே சுற்றுலாப் பயணிகள் யாரும் ஒகேனக்கல்லுக்கு சுற்றுலா வர வேண்டாம். மேலும் தருமபுரி மாவட்ட நிா்வாகம் மேற்கொள்ளும், கரோனா தடுப்பு நடவடிக்கைகளுக்கு அனைத்துத் தரப்பினரும் முழு ஒத்துழைப்பு வழங்க வேண்டும் என்று தெரிவித்துள்ளாா்.