தருமபுரி மாவட்டத்தில் உள்ள பிற்படுத்தப்பட்டோா் மாணவா், மாணவியா் விடுதிகளை மாநில பிற்படுத்தப்பட்டோா் நலத்துறை அமைச்சா் எஸ்.எஸ்.சிவசங்கா் செவ்வாய்க்கிழமை பாா்வையிட்டு ஆய்வு செய்தாா்.
தருமபுரி மாவட்டத்தில் உள்ள பிற்படுத்தப்பட்டோா் மற்றும் மிகவும் பிற்படுத்தப்பட்டோா் நலத்துறை சாா்பில் செயல்படும் பள்ளி மற்றும் கல்லூரி மாணவா், மாணவியா் விடுதிகளை மாநில பிற்படுத்தப்பட்டோா், மிகவும் பிற்படுத்தப்பட்டோா் நலத்துறை அமைச்சா் எஸ்.எஸ்.சிவசங்கா் நேரில் பாா்வையிட்டாா்.
அதியமான்கோட்டை மாணவா் விடுதி, தருமபுரி அரசு கலைக் கல்லூரி அருகே உள்ள மாணவியா் விடுதி, தருமபுரி ஔவையாா் மகளிா் பள்ளி வளாகத்தில் உள்ள மாணவியா் விடுதி, அன்னசாகரத்தில் உள்ள மாணவா் விடுதி, ராமக்காள் ஏரி அருகே உள்ள மாணவியா் விடுதி மற்றும் பிக்கிலி, மாமரத்துப்பள்ளம் ஆகியப் பகுதிகளில் உள்ள மாணவா், மாணவியா் விடுதிகளை நேரில் பாா்வையிட்டு அமைச்சா் எஸ்.எஸ்.சிவசங்கா் ஆய்வு செய்தாா்.
ஆய்வின்போது, விடுதிகளில் உள்ள அடிப்படை வசதிகள், மாணவா்களுக்கு வழங்கப்படும் உணவின் தரம் ஆகிய விவரங்களை மாணவா்களிடம் அவா் கேட்டறிந்தாா். இதில், அன்னசாகரம் விடுதிக்கு சாலை வசதியும், தருமபுரி மகளிா் விடுதிக்கு தண்ணீா் வசதியும் செய்துதர வேண்டும் என மாணவா்கள் தரப்பில் கோரிக்கை முன் வைக்கப்பட்டது.
இக்கோரிக்கைகள் மீது உரிய நடவடிக்கை எடுக்கப்படும் என அமைச்சா் உறுதியளித்தாா். இதைத் தொடா்ந்து, அதிகாரிகள் பங்கேற்ற ஆலோசனைக் கூட்டத்தில் அமைச்சா் கலந்துகொண்டு பேசினாா்.
பென்னாகரம்...
அதுபோல பென்னாகரம், பாப்பாரப்பட்டியில் உள்ள பள்ளி, கல்லூரி மாணவியா் விடுதிகளில் அமைச்சா் சிவசங்கா் ஆய்வு செய்தாா்.
பென்னாகரம் அருகே மாமரத்துப்பள்ளம் பகுதியில் உள்ள அரசு கலை மற்றும் அறிவியல் கல்லூரி மாணவியா் விடுதியில் அமைச்சா் ஆய்வு மேற்கொண்டாா். அப்போது இங்கு மாணவா் விடுதி இல்லாததால் மாணவா்கள் வெளியில் தங்கி கல்விப் பயில்கின்றனா். எனவே மாணவா்களுக்கென விடுதி அமைத்துத் தருமாறு முன்னாள் எம்எல்ஏ இன்பசேகரன் உள்ளிட்டோா் வேண்டுகோள் விடுத்தனா். அதை பரிசீலனை செய்து வரும் கல்வி ஆண்டில் மாணவா் விடுதி அமைக்க நடவடிக்கை எடுப்பதாக அமைச்சா் உறுதி அளித்தாா்.
ஆய்வின்போது, மாவட்ட பிற்படுத்தப்பட்டோா் நல அலுவலா் ஐயப்பன், தருமபுரி மாவட்ட திமுக பொறுப்பாளா்கள் தடங்கம் பெ.சுப்ரமணி (கிழக்கு), பிஎன்பி இன்பசேகரன் (மேற்கு) மற்றும் அரசு அலுவலா்கள் உடனிருந்தனா்.