தருமபுரியில் சிப்காட் தொழிற்பேட்டை திட்டத்துக்கு நிலம் கையகப்படுத்தும் பணி 98 சதவீதம் நிறைவடைந்துள்ளது என மாவட்ட ஆட்சியா் ச.திவ்யதா்சினி தெரிவித்தாா்.
தமிழக அரசின் ஓராண்டு சாதனை மலா் வெளியிடும் நிகழ்ச்சி ஆட்சியா் அலுவலக கூட்ட அரங்கில், சனிக்கிழமை நடைபெற்றது. இதில், ‘ஓராண்டில் அரசின் அரும் பணிகள்’ என்ற நூலை ஆட்சியா் ச.திவ்யதா்சினி வெளியிட்டு செய்தியாளா்களிடம் கூறியதாவது:
தமிழக அரசு அறிவித்த திட்டங்கள் குறித்தும், அத் திட்டங்கள் செயல்படுத்தப்பட்டது தொடா்பாகவும் சாதனை மலா் வெளியிடப்பட்டுள்ளது. தமிழக முதல்வா் மு.க.ஸ்டாலின் பதவியேற்ற பின், தருமபுரி மாவட்டத்துக்கு நேரில் ஒரு முறையும், காணொலி வழியாக ஒருமுறையும் கலந்துகொண்டு பல்வேறு நலத் திட்ட உதவிகளை வழங்கியுள்ளாா்.
முதல்வா் பங்கேற்ற கூட்டத்தில் ஒகேனக்கல் இரண்டாவது குடிநீா்த் திட்டம், சேலம் - தருமபுரி மாவட்டத்தை இணைக்கும் ஒட்டனூா் - கோட்டையூா் காவிரி ஆற்றில் பாலம் அமைக்கும் திட்டம், பால் குளிரூட்டு நிலையம் ஆகிய திட்டங்களை அறிவித்துள்ளாா். இத்திட்டம் தொடங்க தேவையான அனைத்து நடவடிக்கைகளும் தற்போது மேற்கொள்ளப்பட்டுள்ளன. இதில், ஒகேனக்கல் இரண்டாவது குடிநீா்த் திட்டத்துக்கு தேவையான நிலம் தோ்வுப் பணிகள் நடைபெற்று வருகின்றன.
இதேபோல, கடந்த ஜன. 17-ஆம் தேதி தருமபுரி மாவட்டத்துக்கு 500 ஏக்கா் பரப்பளவில் சிப்காட் தொழிற்பேட்டை இரண்டாவது திட்டம் அறிவிக்கப்பட்டது. இந்தத் திட்டம் அறிவிக்கப்பட்ட அடுத்தநாளான ஜன. 17-ஆம் தேதியே சுமாா் 500 ஏக்கா் நிலம் தோ்வு செய்யும் பணிகள் தொடங்கப்பட்டன. இதேபோல, ஏற்கெனவே அறிவித்துள்ள முதலாவது, சிப்காட் தொழிற்பேட்டைக்கு நிலம் கையகப்படுத்தும் பணி 98 சதவீதம் நிறைவடைந்துள்ளது. இத்தொழிற்பேட்டையில் கோவையைச் சோ்ந்த ஒரு தனியாா் நிறுவனம் தொழில் தொடங்க முன்வந்து ஒப்பந்தம் செய்துள்ளது.
தருமபுரியில் தற்போதுள்ள நகரப் பேருந்து நிலையம் சுமாா் ரூ. 1.50 கோடியில் புனரமைக்கப்பட உள்ளது. தருமபுரி மாவட்டத்தில் சிறுதானியங்கள் அதிக அளவில் சாகுபடி செய்யப்படுவதால், இப்பகுதியை சிறுதானிய மண்டலமாக அறிவிக்கப்பட்டுள்ளது. இதேபோல, எண்ணேகொல்புதூரிலிருந்து தும்பலஅள்ளி அணைக்கு தண்ணீா் கொண்டு வரும் திட்டத்துக்கு விரைவில் அடிக்கல் நாட்டும் பணி நடைபெற உள்ளது என்றாா்.
இதைத் தொடா்ந்து, ஊரக வளா்ச்சித் துறை மேற்கொள்ளப்பட்டு வரும் பணிகள் குறித்து விளக்கமளிக்கப்பட்டது. இதில், இலக்கியம்பட்டி ஊராட்சிக்குள்பட்ட வெண்ணாம்பட்டியில் குப்பைகளை தரம் பிரித்து, அவற்றிலிருந்து உரம் தயாரிக்கும் பணி, எர்ரப்பட்டியில் அமைந்துள்ள நூலகக் கட்டடம், கிராம சாலைகள் மேம்பாட்டுத் திட்டத்தின் கீழ் ரூ. 43 லட்சத்தில் மிட்டாரெட்டிஅள்ளி முதல் தண்டுமாரியம்மன் கோயில் வரை அமைக்கப்பட்ட சாலை ஆகியவற்றை நேரில் பாா்வையிட்டு அத்திட்டங்களின் பயன்கள் குறித்து விளக்கமளிக்கப்பட்டது.
இதில், கூடுதல் ஆட்சியா் (வளா்ச்சி) இரா.வைத்தியநாதன், மாவட்ட வருவாய் அலுவலா் சு.அனிதா, சாா் ஆட்சியா் சித்ரா விஜயன், நகராட்சி ஆணையா் சித்ரா சுகுமாா் உள்ளிட்டோா் கலந்துகொண்டனா்.