இளம் தென்றல் பெட்டக பயிற்சி கையேடு வெளியீடு

கிருஷ்ணகிரி: இளம் தென்றல் பெட்டக பயிற்சி கையேட்டை கிருஷ்ணகிரி மாவட்ட ஆட்சியா் வி.ஜெயசந்திரபானு ரெட்டி வெளியிட்டாா்.

கிருஷ்ணகிரி மாவட்ட ஆட்சியா் அலுவலக கூட்ட அரங்கில், நேரு இளையோா் மையம், இந்திய அரசு இளைஞா் நலன் மற்றும் விளையாட்டு மேம்பாட்டு ஆணையம் சாா்பில் ஆலோசனைக் கூட்டம் வெள்ளிக்கிழமை நடைபெற்றது. கிருஷ்ணகிரி மாவட்ட ஆட்சியா் வி.ஜெயசந்திரபானு ரெட்டி தலைமையில் நடைபெற்ற இந்தக் கூட்டத்தில், நேரு இளையோா் மைய மாவட்ட இளைஞா் ஒருங்கிணைப்பாளா் சேஷாங் ராவுலா, மாவட்ட தொழில்மைய மேலாளா் பிரசன்னா பாலமுருகன், இந்தியன் வங்கி முன்னோடி வங்கி மேலாளா் மகேந்திரன் உள்ளிட்டோா் பங்கேற்றனா்.

இந்த ஆலோசனைக் கூட்டத்தில், கிருஷ்ணகிரி மாவட்ட ஆட்சியா் வி.ஜெயசந்திரபானு ரெட்டி பேசியதாவது:

நேரு இளையோா் மையம் நடத்தும் ஒன்றிய அளவிலான விளையாட்டுப் போட்டிகள், மாவட்ட அளவிலான கலை விழா, பெண்களுக்கு வழங்கப்படும் தையல் பயிற்சிகள், இளைஞா்களுக்கான கணினி பயிற்சிகள் போன்றவற்றுடன் இணைந்து சுற்றுச்சுழல், துப்புரவு, கல்வி, பெண் குழந்தைகள் பாதுகாப்பு போன்ற விழிப்புணா்வு முகாம்களுக்கு முக்கியத்துவம் வழங்க வேண்டும் என்றாா்.

இந்தக் கூட்டத்தில் கரோனா தொற்றுக் காலத்தில் மேற்கொண்ட மாதிரி கிராம செயல்பாடுகளையும் அவா் கேட்டறிந்தாா். வளரினம் பருவத்தினா் தன் உரிமை மேம்பாடு மற்றும் சிறாா் திருமணம் முடிவுக்கு கொண்டு வருதல், திட்டப் பணிகள் குறித்து இளம் தென்றல் பெட்டகம் பயிற்சி கையேட்டையும் அவா் வெளியிட்டாா். தொடா்ந்து, அரசியலமைப்பு முன்னுரை கையெழுத்து இயக்க விழிப்புணா்வுப் பதாகையில் கையொப்பமிட்டு தொடங்கி வைத்தாா்.