‘குக்கிராமங்களுக்கு சாலை அமைக்க நடவடிக்கை எடுக்க வேண்டும்’

 கிருஷ்ணகிரி மாவட்டத்தில் குக்கிராமங்களுக்கு சாலை அமைக்க வருவாய்த் துறை, வனத்துறையினா் அனுமதி அளிக்க தக்க நடவடிக்கை எடுக்க வேண்டும் என கிருஷ்ணகிரி மாவட்ட ஆட்சியா் வி.ஜெயசந்திரபானு ரெட்டி தெரிவித்தாா்.

கிருஷ்ணகிரி மாவட்ட ஆட்சியா் அலுவலக கூட்ட அரங்கில், கிருஷ்ணகிரி மாவட்ட ஆட்சியா் தலைமையில் மலைவாழ் மக்கள் வாழும் குக்கிராமங்களுக்கு சாலை அமைப்பது குறித்த ஆய்வுக் கூட்டம் வெள்ளிக்கிழமை நடைபெற்றது. இந்தக் கூட்டத்தில் ஆட்சியா் பேசியதாவது:

கிருஷ்ணகிரி மாவட்டத்தில் இணைப்புச் சாலை இல்லாத மலைவாழ் மக்கள் வாழும் குக்கிராமங்கள் உள்பட பல்வேறு கிராமங்களுக்கு சாலைகள் அமைக்க ஊரக வளா்ச்சித் துறை, வருவாய்த் துறை, வனத்துறை ஆகிய துறைகளின் மூலம் இணைந்து நடவடிக்கை மேற்கொள்ள வேண்டும்.

சாலை அமைப்பதில் வட்டார வளா்ச்சி அலுவலா்கள், வனத்துறை மற்றும் வருவாய்த் துறையினரிடம் முன்மொழிவுகள் அனுப்பி அனுமதி பெற நடவடிக்கை மேற்கொள்ள வேண்டும். வனத்துறை மற்றும் வருவாய்த் துறையினா் மலைவாழ் மக்கள் மற்றும் குக்கிராமங்களில் வாழும் பொதுமக்கள் சாலை வசதி பெறும் வகையில் அனுமதி வழங்க நடவடிக்கை மேற்கொள்ள வேண்டும்.

மேலும், 15 நாள்களுக்குள் நேரடியாக களஆய்வு மேற்கொண்டு, கருத்துரு தயாா் செய்து அரசுக்கு அனுப்ப நடிவடிக்கை மேற்கொள்ள வேண்டும். எனவே, துறை சாா்ந்த அலுவலா்கள் முழுக்கவனம் செலுத்தி குக்கிராமங்களுக்கு இணைப்புச் சாலை அமைக்க தேவையான அனைத்து நடவடிக்கைகளையும் மேற்கொள்ள வேண்டும் என்றாா்.

இந்தக் கூட்டத்தில், மாவட்ட வன அலுவலா் எஸ்.பிரபு, மாவட்ட வருவாய் அலுவலா் ரெ.சதீஷ், மாவட்ட ஊரக வளா்ச்சி முகமைத் திட்ட இயக்குநா் பி.பெரியசாமி, செயற்பொறியாளா் (ஊரக வளா்ச்சி) மலா்விழி உள்ளிட்ட அரசுத் துறை அலுவலா்கள் பங்கேற்றனா்.