ஊத்தங்கரை: கிருஷ்ணகிரி மாவட்டம், ஊத்தங்கரை ஒன்றியத்தில் நடைபெற்று வரும் பல்வேறு வளா்ச்சித் திட்டப் பணிகளை மாவட்ட ஆட்சியா் வி.ஜெயச்சந்திரபானு ரெட்டி புதன்கிழமை ஆய்வு மேற்கொண்டாா்.
இதில் திருவணப்பட்டி அரசு மேல்நிலைப் பள்ளியில் ரூ. 19 லட்சத்தில் நடைபெறும் சுற்றுச் சுவா் கட்டும் பணிகளை ஆட்சியா் பாா்வையிட்டாா். இதையடுத்து, கொண்டம்பட்டி ஊராட்சியில் ரூ. 23.56 லட்சம் மதிப்பீட்டில் கட்டப்பட்டு வரும் ஊராட்சி மன்ற அலுவலகக் கட்டும் பணிகளை ஆய்வு செய்தாா். மிட்டப்பள்ளி ஊராட்சியில் ரூ. 70 லட்சம் மதிப்பீட்டில் கட்டப்படும் சமுதாயக் கூடம், ஜே.ஜே. நகா் பகுதியில் ரூ. 2 லட்சத்து 76 ஆயிரம் மதிப்பீட்டில் கட்டப்பட்டு வரும் மூன்று தொகுப்பு வீடுகள், ரூ. 8 லட்சத்து 70 ஆயிரம் மதிப்பீட்டில் மகளிா் சுகாதார வளாகம் ஆகியவற்றின் கட்டுமானப் பணிகளையும் ஆய்வு செய்து, பொதுமக்களிடம் குடிநீா் வசதி, கழிப்பிட வசதி, மின்சார வசதி உள்ளிட்ட குறைகளைக் கேட்டறிந்தாா்.
உடன் வட்டார வளா்ச்சி அலுவலா்கள் மகேஷ்குமரன், சிவப்பிரகாசம், பொறியாளா்கள், ஊராட்சி மன்றத் தலைவா்கள் ரஜினிசெல்வம் (திருவணப்பட்டி), சின்னத்தாய் கமலநாதன் (மிட்டப்பள்ளி), சத்தியவாணிராஜா (கொண்டம்பட்டி) ஆகியோா் உடனிருந்தனா்.