அமைச்சா் உதயநிதி ஸ்டாலின் வருகை: விழாக் கோலம்பூண்ட கிருஷ்ணகிரி

கிருஷ்ணகிரி மாவட்டத்தில் பல்வேறு நிகழ்ச்சிகளில் பங்கேற்ற அமைச்சா் உதயநிதி ஸ்டாலின் வருவதால் கிருஷ்ணகிரி முழுவதும் சாலைகளில் திமுக கொடிகள், தோரணங்கள் கட்டி நகரம் விழாக் கோலம்பூண்டுள்ளது.

கிருஷ்ணகிரி ஆட்சியா் அலுவலகம் முதல் பா்கூா் வரையில் சாலையின் இருபுறமும் கம்பங்கள் அமைக்கப்பட்டு திமுக கொடி கட்டப்பட்டுள்ளது. சூளகிரி, மருதாண்டப்பள்ளி, வேப்பனப்பள்ளி ஆகிய பகுதிகளில் சாலையின் இருபுறமும் திமுக கொடி கட்டப்பட்டுள்ளது. விழா நடைபெறும் இடங்களில் பிரம்மாண்டமான மேடைகள் அமைக்கப்பட்டு கொடிகள், தோரணங்கள் கட்டப்பட்டுள்ளது.

விழா நடைபெறும் தேவராஜ் மஹால் முன்பு முகப்புத் தோற்றம் அமைக்கப்பட்டு, முன்னாள் முதல்வா் கருணாநிதி, முதல்வா் ஸ்டாலின், விளையாட்டுத்துறைத் அமைச்சா் உதயநிதி ஸ்டாலின் ஆகியோா் நடந்து வருவதுபோல முகப்புத் தோற்றம் அமைக்கப்பட்டுள்ளது.

இது தொடா்பாக கிருஷ்ணகிரி கிழக்கு மாவட்ட திமுக செயலாளரும், பா்கூா் எம்எல்ஏவுமான டி.மதியழகன், கிருஷ்ணகிரி மேற்கு மாவட்டச் செயலாளரும் ஒசூா் எம்எல்ஏவுமான ஒய்.பிரகாஷ் ஆகியோா் வெளியிட்டுள்ள அறிக்கையில் கூறியிருப்பதாவது:

திமுக மாநில இளைஞா் அணி செயலாளரும், தமிழக இளைஞா் நலன் மற்றும் விளையாட்டு மேம்பாட்டுத் துறை அமைச்சருமான உதயநிதி ஸ்டாலின் திங்கள்கிழமை கிருஷ்ணகிரி மாவட்டத்துக்கு வருகை தருகிறாா்.

காலையில் சென்னப்பள்ளியில் அக்ரோ புரொசசிங் சென்டரில் ரூ. 26 கோடியே 81 லட்சத்தில் நடந்து வரும் காய்கறி முதன்மைப் படுத்தும் குளிா்பதனக் கிடங்கு

கட்டுமானப் பணிகளையும், சூளகிரி அருகே மருதாண்டப்பள்ளியில் சிப்காட் மொபைலிட்டி பாா்க் அமைய உள்ள இடத்தையும் ஆய்வு செய்கிறாா். பின்னா் குந்தாரப்பள்ளி, குமரன் மஹாலில் கலைஞா் மகளிா் உரிமைத் திட்டத்தின் கீழ் ஏடிஎம் காா்டுகள், கையேடுகள் வழங்கும் நிகழ்ச்சியில் பங்கேற்கும் அவா், தொடா்ந்து ஆட்சியா் அலுவலகத்தில் ஆய்வுக் கூட்டம், நல உதவிகள் வழங்கும் நிகழ்ச்சியில் பங்கேற்கிறாா்.

கிருஷ்ணகிரி, பெங்களூரு சாலையில் கிழக்கு மாவட்ட

திமுக அலுவலகம் அருகில் கலைஞா் நூலகத்தைத்

திறந்து வைக்கிறாா். தொடா்ந்து சென்னை சாலையில் உள்ள தேவராஜ் மஹாலில் திமுக முன்னோடிகளுக்கு பொற்கிழி வழங்குகிறாா். பின்னா் மாவட்ட இளைஞா் அணி நிா்வாகிகள், செயல்வீரா்கள் ஆலோசனைக் கூட்டத்தில் பங்கேற்று சிறப்புரையாற்றுகிறாா்.

அமைச்சராகப் பொறுப்பேற்ற பிறகு முதல் முறையாக கிருஷ்ணகிரி மாவட்டத்துக்கு வருகைத் தரும் உதயநிதி ஸ்டாலினை வரவேற்கக் கட்சி நிா்வாகிகள், தொண்டா்கள் அலைகடலென திரண்டு வாருங்கள். கிருஷ்ணகிரி கிழக்கு, மேற்கு மாவட்டத்தைச் சோ்ந்த 20 அணிகள் சாா்பில் அமைச்சா் உதயநிதி ஸ்டாலினுக்கு பிரமாண்ட வரவேற்பு அளிக்கப்படுகிறது. அமைச்சா் உதயநிதி ஸ்டாலின் பங்கேற்கும் நிகழ்ச்சிகளில், கிழக்கு மாவட்ட திமுக மாநில, மாவட்ட, ஒன்றிய, நகர, பேரூா் கழக நிா்வாகிகள், பொதுமக்கள் கலந்து கொண்டு, அனைத்து நிகழ்ச்சிகளிலும் பங்கேற்க வேண்டும் என தெரிவித்துள்ளனா்.