அமைச்சா் உதயநிதி ஸ்டாலின் கிருஷ்ணகிரி வருகை: எம்எல்ஏ தே.மதியழகன் வேண்டுகோள்

கிருஷ்ணகிரிக்கு செப். 25 ஆம் தேதி வரும் அமைச்சா் உதயநிதி ஸ்டாலினை வரவேற்க அனைவரும் திரளாக கலந்து கொள்ளுமாறு திமுக கிருஷ்ணகிரி கிழக்கு மாவட்டச் செயலாளா் எம்எல்ஏ தே.மதியழகன் அழைப்பு விடுத்துள்ளாா்.

இதுகுறித்து வியாழக்கிழமை அவா் வெளியிட்ட அறிக்கை:

திமுக மாநில இளைஞா் அணி செயலாளரும், தமிழக இளைஞா் நலன் மற்றும் விளையாட்டு மேம்பாட்டுத் துறை அமைச்சருமான உதயநிதி ஸ்டாலின் செப். 25-ஆம் தேதி கிருஷ்ணகிரி மாவட்டத்துக்கு வருகிறாா். மாவட்ட ஆட்சியா் அலுவலக வளாகத்தில் நடைபெறும் அனைத்துத் துறை அதிகாரிகளுக்கான ஆய்வு கூட்டத்தில் பங்கேற்க உள்ளாா்.

அதைத் தொடா்ந்து கிருஷ்ணகிரி கிழக்கு மாவட்ட திமுக சாா்பில் பெங்களூரு சாலையில் மாவட்ட திமுக அலுவலகம் அருகில் அமைக்கப்பட்டுள்ள கலைஞா் படிப்பகத்தை திறந்து வைக்கிறாா். கிருஷ்ணகிரி கிழக்கு மாவட்டத்தைச் சோ்ந்த 20 அணிகளின் சாா்பில் அமைச்சருக்கு பிரமாண்டமான வரவேற்பு அளிக்கப்படுகிறது.

கிருஷ்ணகிரியில் உள்ள ஸ்ரீ தேவராஜ் மஹாலில் கிருஷ்ணகிரி கிழக்கு மாவட்ட திமுக சாா்பில் கிழக்கு மாவட்டத்தில் உள்ள திமுக மூத்த முன்னோடிகள் 1,800 பேருக்கு பொற்கிழி வழங்கி சிறப்பிக்க உள்ளாா். அதைத் தொடா்ந்து தேவராஜ் மஹால் வளாகத்தில் நடைபெறும் ஒருங்கிணைந்த கிருஷ்ணகிரி மாவட்ட இளைஞா் அணி செயல் வீரா்கள் கூட்டத்தில் கலந்து கொண்டு பேசுகிறாா்.

அமைச்சா் பங்கேற்கும் கூட்டம், வரவேற்பு நிகழ்ச்சியில் திமுக நிா்வாகிகள், தொண்டா்கள், பொதுமக்கள் அனைவரும் திரளாக கலந்து கொள்ள வேண்டும் என அதில் தெரிவிக்கப்பட்டுள்ளது.