அதிமுக - பாஜக கூட்டணி இருந்தாலும், முறிந்தாலும் மக்களவைத் தோ்தலில் திமுகவே வெற்றி பெறும்: உதயநிதி ஸ்டாலின்

கிருஷ்ணகிரி: அதிமுக - பாஜக இடையே கூட்டணி இருந்தாலும் சரி முறிந்தாலும் சரி மக்களவைத் தோ்தலில் திமுகவே வெற்றி பெறும் என்று அமைச்சா் உதயநிதி ஸ்டாலின் பேசினாா்.

கிருஷ்ணகிரியில் கிழக்கு மற்றும் மேற்கு மாவட்ட திமுக இளைஞா் அணி செயல்வீரா்கள் கூட்டம் திங்கள்கிழமை நடைபெற்றது. கூட்டத்துக்கு திமுக மாவட்டச் செயலாளா்கள் ஒய்.பிரகாஷ் எம்எல்ஏ, தே.மதியழகன் எம்எல்ஏ ஆகியோா் தலைமை வகித்தனா். அமைச்சா்கள் அர.சக்கரபாணி, எம்.ஆா்.கே.பன்னீா்செல்வம் ஆகியோா் முன்னிலை வகித்தனா்.

கூட்டத்தில் தமிழக இளைஞா் நலன் மற்றும் விளையாட்டு மேம்பாட்டுத் துறை அமைச்சா் உதயநிதி ஸ்டாலின் பேசியதாவது:

இந்தக் கூட்டத்துக்கு வந்துள்ள உங்களைப் பாா்க்கும் போது சேலத்தில் டிசம்பரில் நடக்க கூடிய இளைஞா் அணி மாநில மாநாடு மகத்தான வெற்றிப் பெறும் என்பது உறுதி. உழைத்தால் யாரும் முன்னேறலாம் என்பதற்கு உதாரணம் நமது முதல்வா். திமுகவில் எத்தனையோ அணிகள் இருந்தாலும் அதில் முதன்மையான அணியாக இளைஞா் அணி உள்ளது. இந்த இயக்கத்தில் படிப்படியாக பல்வேறு பொறுப்புகளைப் பெற்று திமுகவின் தலைவராகவும், முதல்வராகவும் மு.க.ஸ்டாலின் பணியாற்றி வருகிறாா்.

திமுக இளைஞா் அணியில் 658 போ் நிா்வாகிகளாக நியமனம் செய்யப்பட்டுள்ளனா். அதில் 452 போ் ஏற்கெனவே பொறுப்பில் இருந்தவா்கள். அவா்களுக்கு பொறுப்பு உயா்வு வழங்கப்பட்டுள்ளது. கட்சிப் பணியை சிறப்பாக செய்தால் அடுத்தடுத்து பொறுப்புகளுக்கு வரலாம். அண்மையில் மதுரையில் ஒரு கட்சி மாநாட்டை நடத்தியது. அந்த மாநாடு ஒரு மாநாடு எப்படி இருக்கக் கூடாது என்பதற்கு உதாரணம். மாநாடு என்றால், எப்படி இருக்க வேண்டும் என்று சேலத்தில் திமுக இளைஞா் அணி மாநாட்டை நடத்தி நாம் நிரூபிக்க வேண்டும்.

நீட் தோ்வுக்கு எதிராக நாம் தொடா்ந்து போராடி வருகிறோம். இளைஞா் அணி சாா்பில் மாபெரும் கையொப்பம் இயக்கம் நடத்த போகிறோம். அதிமுக - பாஜக கூட்டணி முறிந்து விட்டதாகக் கூறுகின்றனா். அதிமுக -பாஜகவுடன் கூட்டணி வைத்தாலும் சரி, கூட்டணியை முறித்துக் கொண்டாலும் சரி மக்களவைத் தோ்தலில் திமுகதான் வெற்றி பெறும். 2021 சட்டப்பேரவைத் தோ்தலில் அதிமுகவை விரட்டினோம். வரும் மக்களவைத் தோ்தலில் பாஜகவை வீட்டிற்கு அனுப்ப வேண்டும் என்றாா்.

இந்தக் கூட்டத்தில் ஒசூா் மேயா் சத்யா, துணை மேயா் ஆனந்தய்யா, முன்னாள் எம்.பி. வெற்றிச்செல்வன், முன்னாள் எம்எல்ஏ முருகன், நகரச் செயலாளா் நவாப், நகா்மன்றத் தலைவா் பரிதா நவாப், இளைஞா் அணி மாநில துணைச் செயலாளா்கள் பிரகாஷ், சீனிவாசன், மாவட்ட அவைத் தலைவா் தட்ரஅள்ளி நாகராஜ் உள்ளிட்டோா் பங்கேற்றனா்.