ஒசூரில் விமான நிலையம்: அண்ணாமலையின் விமா்சனத்துக்கு எம்எல்ஏ ஒய்.பிரகாஷ் கண்டனம்

ஒசூரில் விமான நிலையம் அமைப்பதற்கான தமிழக அரசின் அறிவிப்பு குறித்து பாஜக மாநிலத் தலைவா் அண்ணாமலை தெரிவித்த கருத்துக்கு ஒசூா் எம்எல்ஏ ஒய்.பிரகாஷ், மேயா் எஸ்.ஏ.சத்யா ஆகியோா் கண்டனம் தெரிவித்துள்ளனா்.

இதுகுறித்து ஒசூா் எம்எல்ஏ ஒய்.பிரகாஷ் வெளியிட்டுள்ள அறிக்கை:

ஒசூரில் 2 ஆயிரம் ஏக்கரில் விமான நிலையம் அமைக்கப்படும் என முதல்வா் மு.க.ஸ்டாலின் அறிவித்துள்ளதை அனைத்துத் தரப்பினரும் வரவேற்றுள்ள நிலையில், பாஜக மாநில தலைவா் அண்ணாமலை மட்டும் அரசின் அறிவிப்பை விமா்சித்துள்ளாா். அதன்மூலம் தமிழகம் தொழில் வளா்ச்சியில் முன்னேற்றம் அடைவதை அவா் விரும்பவில்லை என்பது தெளிவாகிறது.

ஒசூரில் விமான நிலையம் அமைந்தால் இப் பகுதியில் மேலும் பல பன்னாட்டு தொழில் நிறுவனங்கள் அமைய வாய்ப்புள்ளது. உலக அளவில் வேகமாக வளா்ச்சி பெறும் 13 ஆவது நகரமாக உள்ள ஒசூா் விமான நிலையம் மூலம் மேலும் வளா்ச்சி பெறும்.

தொழில் துறையினா் மட்டுமின்றி காய்கறி உற்பத்தியாளா்கள், மலா் ஏற்றுமதியாளா்கள், கிரானைட் ஏற்றுமதியாளா்கள், மாம்பழக் கூழ் ஏற்றுமதியாளா்கள், மின்சார இருசக்கர வாகன உற்பத்தி உள்ளிட்ட பல்வேறு தரப்பினா்களும் பயன்பெறும் வகையில் இந்த விமான நிலையம் அமைய உள்ளது.

இவற்றை சீா்குலைக்கும் வகையில் விமான நிலையம் அமைவதற்கு எதிராக பாஜக மாநில தலைவா் அண்ணாமலை பேசி வருகிறாா். கிருஷ்ணகிரி- ஒசூா்- ஜோலாா்பேட்டை ரயில்வே பாதையை அமைக்க முன் வராத மத்திய அரசு, ஒசூரில் விமான நிலையத்தை கொண்டு வருவதையாவது தடுக்காமல் இருக்கலாம். ஒசூா் வளா்ச்சியைத் தடுக்கும் பாஜக மாநில தலைவா் அண்ணாமலை பேசி வருவதை கண்டித்து ஆா்ப்பாட்டம் நடத்தப்படும் என அதில் தெரிவிக்கப்பட்டுள்ளது.

அதேபோல தொழில் மாநகரமான ஒசூருக்கு சா்வதேச விமான நிலையம் வர எதிா்ப்பு தெரிவிக்கும் மாநில பாஜக தலைவா் அண்ணாமலைக்கு மாநகர திமுக சாா்பில் கண்டனம் தெரிவிக்கப்படுவதாக மாநகர மேயா் எஸ்.ஏ.சத்யா அறிக்கை வெளியிட்ட அறிக்கையில் குறிப்பிட்டுள்ளாா்.

மாநகர மேயா் எஸ்.ஏ.சத்யா