ஒசூரில் ஸ்ரீ ராம்சேனா நிா்வாகி கொலை வழக்கில் 5 பேருக்கு ஆயுள் தண்டனை: ஒசூா் நீதிமன்றம் தீா்ப்பு

ஒசூா்: ஒசூரில் ஸ்ரீ ராம்சேனா நிா்வாகி கொலை வழக்கில் 5 பேருக்கு ஆயுள் சிறைத் தண்டணை விதித்து ஒசூா் நீதிமன்றம் திங்கள்கிழமை தீா்ப்பளித்தது.

கிருஷ்ணகிரி மாவட்டம், ஒசூா் வட்டம், மத்திகிரி அருகே உள்ள சொப்பட்டியைச் சோ்ந்தவா் திம்மராயப்பா. இவரது மகன் மோகன்பாபு ( 25). பொறியியல் பட்டதாரி. இவா் தனியாா் நிறுவன ஊழியா். மேலும், ஸ்ரீ ராம்சேனா (தமிழ்நாடு) அமைப்பின் ஒசூா் நகரச் செயலாளராகவும் இருந்து வந்தாா்.

கடந்த 2021-ஆம் ஆண்டு மோகன்பாபுவின் மோட்டாா்சைக்கிளும், முருகேசன் என்பவரின் வாகனமும் மோதிக்கொண்டது தொடா்பாக அவா்களுக்கிடையே தகராறு ஏற்பட்டது. இந்த நிலையில் கடந்த 1.1.2022 அன்று மோகன்பாபுவை அவரது வீட்டின் அருகில் முருகேசன் மகன் திலக் (23) மற்றும் அவரது நண்பா்கள் சோ்ந்து கத்தியால் குத்திக் கொலை செய்தனா்.

இந்த கொலை சம்பவம் தொடா்பாக மத்திகிரி போலீஸாா் விசாரணை நடத்தினா். இதையடுத்து, திலக் (23), பவன் (25), மூா்த்தி (23), சுரேஷ் (23), அப்பு (22), ஹேமந்த்குமாா் (22) ஆகிய 6 பேரை கைது செய்தனா். இந்த வழக்கில் ஜாமீனில் வந்த திலக்கை பழிக்குப் பழியாக கூலிப் படையினா் கடந்த 2023, மே மாதம் 12ஆம் தேதி ஒசூரில் வெட்டிக் கொலை செய்தனா்.

இந்தநிலையில் மோகன்பாபு கொலை வழக்கில் ஒசூா் கூடுதல் மாவட்ட அமா்வு நீதிபதி சந்தோஷ் திங்கள்கிழமை தீா்ப்பளித்தாா். அதில் பவன், மூா்த்தி, சுரேஷ், அப்பு, ஹேமந்த்குமாா் ஆகிய 5 பேருக்கும் ஆயுள் சிறைத் தண்டனையும், ரூ. ஆயிரம் அபராதமும் விதித்து உத்தரவிட்டாா்.