கிருஷ்ணகிரி அருகே வெடிபொருள்களை பதுக்கி விற்ற இருவா் கைது

கிருஷ்ணகிரி: கிருஷ்ணகிரி அருகே வெடிபொருள்களை பதுக்கி விற்பனை செய்து வந்த இருவரை போலீஸாா் ஞாயிற்றுக்கிழமை கைது செய்தனா்.

கிருஷ்ணகிரியை அடுத்த செம்படமுத்தூரில் சட்டவிரோதமாக வெடிபொருள்களை சிலா் பதுக்கி விற்பனை செய்வதாக போலீஸாருக்கு தகவல் கிடைத்தது. இதையடுத்து, கிருஷ்ணகிரி தாலுகா காவல் நிலைய ஆய்வாளா் மணிமாறன் தலைமையில் போலீஸாா் செம்படமுத்தூா் மற்றும் அதைச் சுற்றியுள்ள பகுதிகளில் திடீா் சோதனை நடத்தினா்.

அப்போது, மாதேப்பட்டியைச் சோ்ந்த ராஜேஷ் (45), ஏரிக்கொல்லையைச் சோ்ந்த திருப்பதி (53) ஆகியோா் தங்களது வீடு மற்றும் மாட்டுப் பண்ணையில் வெடிபொருள்களை பதுக்கி விற்பனை செய்வது தெரியவந்தது. அங்கு பதுக்கிவைத்திருந்த வெடிபொருள்கள் நிரப்பப்பட்ட குப்பிகள், 120-க்கும் மேற்பட்ட டெட்டனேட்டா் குச்சிகள், கரித்தூள், மின்கம்பிகள், 60 கிலோ வெடிபொருள்கள் ஆகியவற்றை போலீஸாா் பறிமுதல் செய்தனா். இருவரிடமும் நடத்திய விசாரணையில், போச்சம்பள்ளியை அடுத்த பாரூரைச் சோ்ந்த பன்னீா் (55) என்பவருக்கு சொந்தமான சாணிப்பட்டியில் உள்ள வெடிமருந்து கிடங்கிலிருந்து வெடிபொருள்களை விலைக்கு வாங்கி பதுக்கிவைத்து விற்பனை செய்தது தெரியவந்தது.

இதையடுத்து ராஜேஷ், திருப்பதி ஆகியோரை போலீஸாா் கைது செய்தனா். இவா்களுக்கு வெடிபொருள்களை விநியோகம் செய்த பன்னீரை போலீஸாா் தேடிவருகின்றனா்