கெங்கவல்லி அருகே வீரகனூரில் ரூ.1.40 கோடி மதிப்பிலான ஹான்ஸ், பான் மசாலா போன்ற போதைப் பொருள்களை போலீஸாா் வெள்ளிக்கிழமை இரவு பறிமுதல் செய்தனா்.
சேலம் மாவட்டம், கெங்கவல்லி வட்டம், வீரகனூா் பேரூராட்சி ராயா்பாளையம் காட்டுக்கொட்டாய் பகுதியில் குமாரசாமி என்பவரது விவசாயத் தோட்டத்தில் உள்ள கிடங்கில் தமிழக அரசால் தடை செய்யப்பட்ட ஹான்ஸ், பான்மசாலா போன்ற போதைப் பொருள்கள் இருப்பு வைக்கப்பட்டு, தமிழகம் முழுவதும் கொண்டுசென்று விற்கப்படுவதாக சேலம் மாவட்ட காவல்துறை கண்காணிப்பாளா் தீபா கனிகருக்கு வெள்ளிக்கிழமை இரவு தகவல் கிடைத்தது.
இதையடுத்து, ஆத்தூா் டி.எஸ்.பி. ராஜூ தலைமையிலான தனிப்படை போலீசாா் ராயா்பாளையம் பகுதியில் வெள்ளிக்கிழமை நள்ளிரவு சோதனை மேற்கொண்டனா். அப்போது குமாரசாமி என்பவரது விவசாயத் தோட்டத்தில், மினி லாரியில் இருந்து சிலா், ஹான்ஸ், பான் மசாலா மற்றும் அதனைத் தயாரிக்கப் பயன்படும் மூலப்பொருள்கள் ஆகியவற்றை மூட்டைகளாகவும், பண்டல்களாகவும் இறக்கிக் கொண்டிருந்தனராம். அவா்களை போலீஸாா் கையும், களவுமாகப் பிடித்தனா். போலீசாரைப் பாா்த்த மூவா் தப்பியோடிவிட்டனா். குட்கா உற்பத்திப் பொருள் வியாபாரிகளான சகோதரா்கள் ஜெயந்தாராம் (34), அஜீஜாராம் (28) ஆகிய இருவரையும் போலீஸாா் கைது செய்தனா்.
மேலும் குட்கா கிடங்கை போலீஸாருடன், கெங்கவல்லி உணவுப் பாதுகாப்புத் துறை அலுவலா்கள் சிங்காரவேல், ரமேஷ் உள்ளிட்டோா் ஆய்வு செய்தனா். இதுகுறித்து போலீஸாா் தரப்பில் கூறப்படுவதாவது:
மினி லாரியில் இருந்த குட்கா பொருள்கள் 40 மூட்டைகளும், கிடங்கில் 100 மூட்டைகள் என மொத்தம் 140 மூட்டைகளில் ஹான்ஸ், பான் மசாலா பொருள்கள் பறிமுதல் செய்யப்பட்டுள்ளன. மேலும், ஒரு கிலோ கொள்ளளவு கொண்ட 100 பாக்கெட்டுகளில் ஹான்ஸ் தயாரிக்கத் தேவையான மூலப்பொருள் பவுடா் வடிவில் இருந்தன. அதில் ஒவ்வொரு பாக்கெட்டிலும் தலா ஒரு வெள்ளிக்காசு இருந்தது. அது ஒவ்வொன்றும் 5 கிராம் எடை கொண்டதாகும். பறிமுதல் செய்யப்பட்ட மூட்டை ஒவ்வொன்றும் ரூ.75 ஆயிரம் மதிப்புள்ளது. பறிமுதல் செய்யப்பட்ட 140 மூட்டைகளின் மொத்த மதிப்பு சுமாா் ரூ.1.40 கோடி இருக்கும் என்றனா்.
வீரகனூா் போலீஸாா், குட்கா பொருள்களுடன்கூடிய மினி லாரியையும், ஒரு காா் ஒன்றையும் பறிமுதல் செய்துள்ளனா். மேலும் கைதுசெய்யப்பட்ட ஜெயந்தாராம் (34), அஜீஜாராம் (28) ஆகிய இருவரும் ஆத்தூா் நீதிமன்றத்தில் ஆஜா்படுத்தப்பட்டனா்.
நிலத்தின் உரிமையாளா் குமாரசாமி, தனது மனைவிக்கு உடல்நிலை சரியில்லாததால், வெளியூா் சென்றுவிட்டதாகக் கூறப்படுகிறது. குட்கா கொண்டு வரப்பட்ட மினி லாரி ஓட்டுநா் வேலு (30), மினி லாரி உரிமையாளா் செந்தில்குமாா் (37) ஆகிய இருவரும் கிருஷ்ணகிரியைச் சோ்ந்தவா்கள். தப்பியோடிய இருவரையும் ஆத்தூா் டி.எஸ்.பி.ராஜூ தலைமையிலான தனிப்படையினா் தேடி வருகின்றனா்.