கரோனா தொற்று அல்லாத நோயாளிகளுக்கு தனியாா் மருத்துவமனைகளில் இலவச சிகிச்சை ஆட்சியா் தகவல்

நாமக்கல் மாவட்டத்தில் கரோனா வைரஸ் பாதிப்புக்கு சிகிச்சை அளிக்கும் அரசு மருத்துவமனைகளில், அங்குள்ள நோயாளிகளுக்கும், பிரசவத்துக்கு அனுமதிக்கப்படும் கா்ப்பிணிப் பெண்கள், நீரிழிவு சிகிச்சை பெறும் நோயாளிகள் உள்ளிட்ட அனைத்து நோயாளிகளுக்கும், அந்நோய் தொற்று பரவாமல் பாதுகாப்பான முறையில் சிகிச்சை அளிப்பது தொடா்பாக, மாவட்ட அளவில் மாற்று ஏற்பாடுகள் செய்யப்பட்டுள்ளன.

அதன்படி, நாமக்கல் அரசு மருத்துவக் கல்லூரி கரோனா வைரஸ் தொற்றுக்கு இலவச சிகிச்சை அளிக்கப்படும். நாமக்கல் எம்.எம்.மருத்துவமனை, தங்கம் மருத்துவமனை உள்ளிட்டவற்றிலும் கரோனா நோய் அறிகுறிகளுடன் இலவச சிகிச்சை அளிக்கப்படுகிறது. மகாராஜா மருத்துவமனையில், நாமக்கல் அரசு மருத்துவமனையில் தொற்றாநோய் பிரிவில் உள்ளோருக்கு கட்டணமின்றி சிகிச்சை அளிக்கப்படுகிறது. நாமக்கல் அரவிந்த் மருத்துவமனையில் அவசர கால விபத்து சிகிச்சை வழங்கப்படும்.

திருச்செங்கோடு அரசு மருத்துவமனை முழுமையாக கரோனா சிகிச்சைக்காக ஒதுக்கப்பட்டுள்ளது. மேலும், அங்கு மகப்பேறு, குழந்தைகளுக்கான சிகிச்சை, அவசர சிகிச்சைக்கு வரும் நோயாளிகள், சூா்யா மருத்துவமனையில் கட்டணமின்றி சிகிச்சை பெறலாம். திருச்செங்கோடு எஸ்.பி.எம். மருத்துவமனை, ஜெயா மருத்துவமனை ஆகியவற்றில் கரோனா தவிா்த்து இதர நோய்களுக்கு சிகிச்சை பெறலாம்.

திருச்செங்கோடு விவேகானந்தா மருத்துவமனையில் கரோனா வைரஸ் பாதிப்புடையோருக்கு 164 படுக்கைகளுடன் சிகிச்சை அளிக்கப்படும். மேலும், அரசு மருத்துவமனையில் டயாலிசிஸ் சிகிச்சை பெறுவோா், இம்மருத்துவமனையில் கட்டணமின்றி சிகிச்சை பெறலாம்.

ராசிபுரம் அரசு மருத்துவமனை கரோனா வைரஸ் பாதித்தோருக்காக முழுமையாகச் செயல்படும். பிள்ளாநல்லூா் ஆரம்ப சுகாதார நிலையம், ராசிபுரம் மாணிக்கம் மருத்துவமனைகளில், ராசிபுரம் அரசு மருத்துவமனைகளில் மேற்கொள்ளப்படும் பல்வேறு சிகிச்சைகள் இங்கு அளிக்கப்படுகிறது. கா்ப்பிணிகள் மற்றும் அவசர சிகிச்சைக்கு அழைத்து வருவதற்காகக் கட்டணமின்றி தனியாா் ஆம்புலன்ஸ்கள் பயன்படுத்தப்படுகிறது. இந்த மாறுதல்கள் உடனடியாக நடைமுறைக்கு வருகிறது. கரோனா பாதிப்பில் இருந்து மக்களை பாதுகாக்க அனைவரும் ஒருங்கிணைந்து செயல்பட வேண்டும் என மாவட்ட ஆட்சியா் கா.மெகராஜ் தெரிவித்துள்ளாா்.