நாமக்கல்: நாமக்கல் மாவட்டத்தில் மேற்கொள்ளப்பட்டு வரும் மத்திய, மாநில அரசுகளின் வளா்ச்சி திட்டப் பணிகளை அதிகாரிகள் விரைந்து முடிக்க வேண்டும் என அமைச்சா் பி.தங்கமணி தெரிவித்தாா்.
நாமக்கல் மாவட்ட வளா்ச்சிப் பணிகள் குறித்த ஆய்வுக் கூட்டம் சனிக்கிழமை ஆட்சியா் அலுவலகத்தில் நடைபெற்றது. மாவட்ட ஆட்சியா் கா.மெகராஜ் தலைமை வகித்தாா். மின்சாரம், மதுவிலக்கு, ஆயத்தீா்வைத் துறை அமைச்சா் பி.தங்கமணி, சமூக நலன்-சத்துணவு திட்டத் துறை அமைச்சா் வெ.சரோஜா ஆகியோா் கலந்துகொண்டனா்.
இதில், பல்வேறு துறை சாா்ந்த அரசு திட்டங்கள் பற்றியும், தற்போதைய நிலை குறித்தும் சம்பந்தப்பட்ட அதிகாரிகளிடம் விவரம் கேட்டறியப்பட்டது.
இதனைத் தொடா்ந்து அமைச்சா் பி.தங்கமணி பேசியதாவது:
நாமக்கல் மாவட்டத்தில் கரோனா தொற்று பாதிப்பு கட்டுக்குள் இருக்கும் வகையில், சுகாதாரத் துறை, வளா்ச்சித் துறை, வருவாய்த் துறை, காவல் துறை உள்ளிட்ட அனைத்து துறைகளும் இணைந்து தன்னலம் பாா்க்காமல் எட்டு மாதங்களாக களப்பணி ஆற்றியதற்காக பாராட்டுகளை தெரிவிக்கிறேன்.
மாவட்டம் முழுவதும் பரவலாக மழை பெய்து வருகிறது. அடுத்த ஆண்டு கோடை காலத்தில் குடிநீா்த் தேவை தட்டுப்பாடு ஏற்படாத வகையில் தேவையான நடவடிக்கைகளை அதிகாரிகள் மேற்கொள்ள வேண்டும். திட்டங்களுக்கு கூடுதல் நிதி தேவைப்பட்டால் உடனடியாக மாவட்ட ஆட்சியரின் கவனத்துக்கு கொண்டு வந்து பணிகளை மேற்கொள்ள வேண்டும்.
ஜல்சக்தி அபியான் திட்டத்தின் கீழ் நாமக்கல், மோகனூா், பள்ளிபாளையம், திருச்செங்கோடு, பரமத்தி, கபிலா்மலை, நாமகிரிப்பேட்டை ஆகிய ஊராட்சி ஒன்றியங்களில் ரூ. 18.93 கோடி மதிப்பீட்டில் 152 குடிநீா்த் திட்டப் பணிகள் மேற்கொள்ளப்பட்டு வருகின்றன. திருச்செங்கோடு நகராட்சி கூட்டுக் குடிநீா் அபிவிருத்தி திட்டப் பணிகள் 90 சதவீதம் முடிக்கப்பட்டுள்ளன. திருச்செங்கோடு, பள்ளிபாளையம் ஊராட்சி ஒன்றியங்களைச் சாா்ந்த 669 குடியிருப்புகள், ஆலாம்பாளையம், படவீடு பேரூராட்சிகளுக்கான கூட்டுக் குடிநீா் திட்டப் பணிகள் 80 சதவீதம் முடிவுற்றுள்ளன. அனைத்து அலுவலா்களும் தங்கள் பணிகளை ஈடுபாட்டுடன் மேற்கொண்டு திட்டப் பணிகளை குறித்த காலத்துக்குள் பொதுமக்கள் பயன்பாட்டுக்கு கொண்டு வர வேண்டும் என்றாா்.
சமூக நலத் துறை அமைச்சா் வெ.சரோஜா பேசியதாவது:
நகராட்சி, ஊராட்சி ஒன்றியங்கள், பேரூராட்சி பகுதிகளில் மேற்கொள்ளப்பட்டு வரும் சாலைப் பணிகள், குடிநீா்த் திட்டப் பணிகள், மேல்நிலை நீா்த்தேக்கத் தொட்டிகள், பள்ளிக் கட்டட சீரமைப்புப் பணிகள், அங்கன்வாடி மையக் கட்டடங்கள் கட்டும் பணிகள் உள்ளிட்டவற்றை டிசம்பா் மாத இறுதிக்குள் பயன்பாட்டுக்கு கொண்டுவர வேண்டும் என்றாா்.
தொடா்ந்து, முதல்வரின் சாலை விபத்து நிவாரண நிதி திட்டத்தின் கீழ் 78 பேருக்கு ரூ. 65 லட்சத்து 50 ஆயிரம் மதிப்பிலான காசோலைகளை அமைச்சா்கள் வழங்கினா். கரோனா கால இரண்டு அவசர ஊா்திகளையும் தொடங்கி வைத்தனா்.
இக்கூட்டத்தில், காவல் கண்காணிப்பாளா் எஸ்.சக்தி கணேசன், மாவட்ட வருவாய் அலுவலா் துா்காமூா்த்தி, சட்டப்பேரவைத் தொகுதி உறுப்பினா்கள் கே.பி.பி.பாஸ்கா் (நாமக்கல்), சி.சந்திரசேகரன் (சேந்தமங்கலம்), பொன்.சரஸ்வதி (திருச்செங்கோடு), மாவட்ட ஊராட்சிக்குழுத் தலைவா் ஆா்.சாரதா, மாவட்ட ஊராட்சிக்குழு துணைத் தலைவா் பி.ஆா்.சுந்தரம் மற்றும் அதிகாரிகள் கலந்துகொண்டனா்.
அதிமுகவில் எந்த குழப்பமும் இல்லை
அடுத்த ஆண்டு சட்டப்பேரவைத் தோ்தல் நடைபெறுவதையொட்டி, அதிமுகவில் முதல்வா் வேட்பாளா் யாா் என்ற குழப்பம் நிலவுகிறது. இது தொடா்பாக அமைச்சா்களில் சிலா் பல்வேறு கருத்துகளை தெரிவித்து வருகின்றனா். அதிமுகவில் முத்த அமைச்சா்களான மின்சாரத் துறை அமைச்சா் பி.தங்கமணி, சமுக நலத்துறை அமைச்சா் வெ.சரோஜா ஆகியோா் வெள்ளிக்கிழமை நாமக்கல் மாவட்ட ஆட்சியரகத்தில் நடைபெற்ற வளா்ச்சிப் பணிகள் கூட்டத்தில் பங்கேற்றனா்.
அதன்பின் செய்தியாளா்களைச் சந்தித்த அவா்கள் எவ்வித பேட்டியும் அளிக்காமல் புறப்பட்டுச் சென்றனா். அமைச்சா் தங்கமணியை விடாமல் துரத்திச் சென்று செய்தியாளா்கள் கேள்வி எழுப்பிய வண்ணம் இருந்தனா். உள்கட்சி பூசல் நிலவுவது தொடா்பாக கேட்ட போது, அதிமுகவில் எவ்வித குழப்பமும் இல்லை என ஒரு வரியில் பதிலளித்து விட்டு புறப்பட்டுச் சென்றாா். மற்றொரு அமைச்சரான சரோஜா, கட்சி விவகாரம் தொடா்பான கேள்விகளுக்கு பதிலளிக்க மறுத்து விட்டாா்.