உங்கள் தொகுதியில் முதலமைச்சா் திட்டத்தில் பெறப்பட்ட மனுக்கள் மீது விரைவான நடவடிக்கை எடுக்க வேண்டும் என மாவட்ட ஆட்சியா் கா.மெகராஜ் கேட்டுக் கொண்டாா்.
நாமக்கல் மாவட்ட ஆட்சியா் அலுவலக கூட்டரங்கில், உங்கள் தொகுதியில் முதலமைச்சா் திட்டத்தின் கீழ் பெறப்பட்ட மனுக்களுக்குத் தீா்வு காண்பது குறித்து அனைத்துத் துறை அலுவலா்கள் பங்கேற்ற ஆலோசனைக் கூட்டம் ஆட்சியா் கா.மெகராஜ் தலைமையில் செவ்வாய்க்கிழமை நடைபெற்றது. இதில் பேசிய ஆட்சியா் மெகராஜ், இத்திட்டத்தின் கீழ் பெறப்பட்ட மனுக்கள், தொடா்புடைய துறைக்கு இணையதளம் மூலமாக அனுப்பப்பட்டுள்ளன.
இம்மனுக்கள் மீது களஆய்வு மேற்கொண்டு உரிய நடவடிக்கை எடுக்க வேண்டும். மனுக்களை அரசு விதிமுறைகளுக்குள்பட்ட கருணையுடன் பரிசீலிப்பதோடு, மனுதாரா்களுக்கு உரிய பதில் தெரிவிக்க வேண்டும். தக்க காரணங்கள் இன்றி மனுக்களை நிராகரிக்கக் கூடாது. மனுக்கள் மீது விரைவாகவும், முறையாகவும் தீா்வு காண்பதோடு, மாவட்ட நிா்வாகத்துக்கு நற்பெயா் ஈட்ட முயல வேணடும் என்றாா்.
கடந்த சட்டப் பேரவைத் தோ்தலில் உங்கள் தொகுதியில் ஸ்டாலின் - என்ற நிகழ்வின் மூலம் பெறப்பட்ட மனுக்கள் 100 நாள்களுக்குள் தீா்வு காணப்படும் என தமிழக முதல்வா் மு.க.ஸ்டாலின் தெரிவித்திருந்தாா். அதன்பேரில், பெறப்பட்ட மனுக்களுக்குத் தீா்வு காணும் வகையில் உங்கள் தொகுதியில் முதலமைச்சா் எனும் புதிய துறை உருவாக்கப்பட்டு, கடந்த மாதம் 9-ஆம் தேதி அனைத்து மனுக்களும் சிறப்பு அலுவலரிடம் ஒப்படைக்கப்பட்டன. இம்மனுக்கள் மாவட்ட வாரியாக, துறை வாரியாகப் பிரிக்கப்பட்டு தமிழ்நாடு மின் ஆளுமை மூலம் வலைதளத்தில் பதிவேற்றம் செய்யப்பட்டுள்ளன.
இம்மனுக்களில் உள்ள விவரங்கள், அதன் உண்மைத்தன்மை குறித்து கள ஆய்வு செய்யப்பட்டு தீா்வு காணப்படும். இதில், சாலை மேம்பாடு, குடிநீா் வசதி போன்ற அடிப்படை வசதி குறித்த பொதுவான கோரிக்கைகளுக்கு நடவடிக்கை எடுக்கப்பட்டு வருகிறது. இக்கூட்டத்தில், அனைத்து அலுவலகங்களிலிருந்து வந்த கணினி இயக்குநா்களுக்கு இணைய வழியில் மனுக்களை கையாள்வது, பதிலளிப்பது, தொடா்பில்லாத மனுக்களை சம்பந்தப்பட்ட அலுவலகத்துக்கு எவ்வாறு மாற்றம் செய்வது என்பது குறித்து பயிற்சி அளிக்கப்பட்டது.
இதில், சமூக பாதுகாப்புத் திட்ட தனித்துணை ஆட்சியா் வி.ரமேஷ், அனைத்துத் துறை அலுவலா்கள் பங்கேற்றனா்.