நாமக்கல் சிலுவம்பட்டி கிராமத்தில் மேல்நிலை குடிநீா்த் தொட்டியை துளையிட்டு சேதப்படுத்திய புகாரில், ஊராட்சி மன்றத் தலைவா் மீது போலீஸாா் வழக்குப் பதிவு செய்துள்ளனா்.
நாமக்கல் ஆட்சியா் அலுவலகம் அருகே உள்ள சிலுவம்பட்டி ஊராட்சியில் 500-க்கும் மேற்பட்ட குடும்பத்தினா் வசித்து வருகின்றனா். இங்குள்ள ரெட்டியாா் தெரு பகுதியில் உள்ள 60,000 லிட்டா் கொள்ளளவு கொண்ட மேல்நிலை நீா்த்தேக்கத் தொட்டி பயன்பாட்டில் உள்ளது. இந்த நிலையில் கடந்த சில வாரங்களுக்கு முன் ஊராட்சி மன்றத் தலைவா் பழனிவேல் நல்ல நிலையில் இருந்த குடிநீா் தொட்டியை இயந்திரம் கொண்டு துளையிட்டு சேதப்படுத்தியதாகவும், இதனால் தங்களுக்கு முறையாக குடிநீா் கிடைக்காத சூழ்நிலை இருப்பதாகவும், அவா் மீது நடவடிக்கை எடுக்க வேண்டும் எனவும் அப்பகுதி மக்கள் ஆட்சியரிடம் புகாா் தெரிவித்தனா்.
அண்மையில் ஊராட்சி மன்றத் தலைவருக்கு எதிராக சாலை மறியலும் நடைபெற்றது. நாமக்கல் வட்டார வளா்ச்சி அலுவலா் அருளாளன், ஊராட்சி மன்றத் தலைவா் பழனிவேல் அரசின் பொது சொத்தை சேதப்படுத்தியதாக நல்லிபாளையம் காவல் நிலையத்தில் புகாா் அளித்துள்ளாா். அதன்பேரில் நல்லிபாளையம் போலீஸாா் இரு பிரிவுகளின் கீழ் அவா் மீது வழக்குப் பதிவு செய்து விசாரணை செய்து வருகின்றனா்.
-